Դատարանը չի ցանկանում բացահայտել Սամաթիայում հայ կանանց վրա հարձակումները. փաստաբան

Թուրքական ոստիկանությունն ու դատարանը հանցագործության բացահայտման համար չի անում այն, ինչ պարտավոր է. հայտարարել է Ստամբուլի Սամաթիա թաղամասում սպանված տարեց հայուհի Մարիցա Քյուչուքի փաստաբան Էրեն Քեսքինը, հաղորդում է «Ակօսը»:  Նա, ինչպես նաև Մարիցա Քյուչուքի ընտանիքի անդամները, Մարդու իրավունքների պաշտպանության Ստամբուլի մասնաճյուղում հանդիպել են լրագրողների հետ:

«Մի տարածաշրջանում, որտեղ Հայոց ցեղասպանություն է իրականացվել, կասկածներ կան, որ  հայ կնոջ սպանությունն էլ այլատյացության հողի վրա է եղել»,- ասել է Քեսքին: Ըստ նրա` Մարիցա Քյուչուքի սպանության մեջ կասկածվող Մուրադ Նազարյանը վախենում է խոսել հատկապես այն բանից հետո, երբ մենախցից նրան տեղափոխել են ընդհանուր խուց: Նա մտածում է, որ եթե խոսի՝ կսպանվի, այդ պատճառով նրան պետք է մենախուց տեղափոխել: «Ինչո՞ւ փորձագիտական զեկույցը հրապարակվեց ամիսներ անց, ինչո՞ւ այդքան ուշացավ, մի՞թե նպատակ ունեն թաքցնել իրականությունը»,- հարցրել է Մարիցա Քյուչուքի փաստաբանը:

Մարիցա Քյուչուքի դուստրը` Պայծառ Քյուչուքն էլ ասել է, որ պետությունը պետք է օգնի իրենց` մարդասպաններին գտնելու հարցում: Նա միաժամանակ հարց է բարձրացրել, թե ինչու ոստիկանությունը չի ուսումնասիրում Սամաթիայում բռնության ենթարկված տարեց մյուս կանանց` Սուլթան Այքարի և Թուրֆանդա Աշըքի վրա կատարած հարձակումները:

Նոյեմբերի 4-ին տեղի ունեցած դատավարության ընթացքում մեղադրվող Մուրադ Նազարյանը հայտարարել էր, որ ինքը Մարիցա Քյուչուքի սպանության հետ կապ չունի: Նազարյանը դատարանում պնդել էր, որ տարեց կնոջ սպանությունն իրականացրել է ոչ թե ինքը, այլ երեք անծանոթ տղամարդ, որոնք բռնությամբ իրեն տարել են Մարիցա Քյուչուքի բնակարան` ցանկանալով սպանության մեղքը գցել իր վրա: 

http://civilnet.am/2013/11/19/maritsa-kucuk-advocate-on-court-activity