«Ազադլիգ». Պաշտոնական Անկարան Իլհամ Ալիևի դեմ «կոմպրոմատային» հարձակում է սկսել

Թուրքական հեղինակավոր «Hürriyet» թերթը Ադրբեջանի նախագահի՝ Թուրքիա կատարած այցից հետո Ալիևի կլանի մասին պատմող քննադատական հոդված է հրապարակել:
Ինչպես նշում է ադրբեջանական «Ազադլիգ» թերթը՝ նույնիսկ Ադրբեջանի և Թուրքիայի միջև հարաբերությոնների լարված լինելու շրջանում նման նյութ եղբայրական երկրի մամուլում չի հրապարակվել: Պատահական չէ, որ այդ հոդվածը հրապարակվել է Իլհամ Ալիևի՝ Թուրքիա կատարած այցից անմիջապես հետո:

Ըստ թերթի տվյալների՝ Թուրքիան ու Ադրբեջանը չեն կարողանում գալ համաձայնության երկրների միջև վիզային ռեժիմի վերացման, ինչպես նաև հայ-թուրքական սահմանների բացման հարցերում:

Բաքուն մինչ այժմ տարբեր պատրվակներով հետաձգում է պարզեցված վիզային համակարգի անցնելու հարցը: Թուրքիա կատարած այցի ժամանակ Ալիևը նշել է, որ պատճառը տեխնիկական խնդիրներն են: Միևնույն ժամանակ նմանօրինակ գործընթացը եվրոպական երկրների հետ առանց խնդիրների է ընթանում, ինչն էլ զայրացնում է Թուրքիային: Ըստ փորձագետների՝ Իրանն Ադրբեջանի հետ սահմանը վերջին օրերիս փակել է կրկին` ելնելով այդ հանգամանքներից:

Ինչ վերաբերվում է Հայաստանի հետ սահմանի բացմանը, Թուրքիան ցանկանում է այդ հարցը կարճ ժամանակում լուծել: Եթե նախկինում Թուրքիան միանշանակ այդ հարցը կապում էր Ղարաբաղի խնդրի կարգավորման հետ, ապա այժմ պաշտոնական Անկարան ուղղակի սպասում է Ադրբեջանի համաձայնությանը՝ պատասխանատվությունն այդպիսով դնելով Ադրբեջանի վրա:

«Թեև Թուրքիան Իլհամ Ալիևին լավ ընդունեց, բայց և այնպես Բաքվի ու Անկարայի միջև չլուծված հարցեր կան: Թուրքիան ցանկանում է այդ հարցերը լուծել կարճ ժամանակում: Թուրքիայի հետ հարաբերություններում միայն իշխանության շահերը պաշտպանող Իլհամ Ալիևն այդ խնդիրներն ավելի է խորացնում: Երևում է` Թուրքիայի համբերությունն արդեն հատելու վրա է, և Անկարան Իլհամ Ալիևի դեմ «կոմպրոմատային» հարձակում է սկսել»,-գրում է թերթը:

http://panorama.am/am/politics/2013/11/19/turkey-azerbaijan/

Թուրքական թերթը քննադատել է բռնապետ Ալիևին պետական շքանշանով պարգևատրելը

Ադրբեջանի նախագահ Իլհամ Ալիևի՝ Թուրքիա կատարած այցը մնում է թուրքական մամուլի ակտուալ թեմաներից մեկը: Այսպես, «Taraf» թերթը դատապարտել է Իլհամ Ալիևին Անկարայում պետական շքանշանով պարգևատրելը և «Բռնակալին պետական շքանշան» խորագրով քննադատական հոդված է հրապարակել:

«Դա մի երկիր է, որը ժողովրդավարության ինդեքսում 148 երկրների մեջ զբաղեցնում է 139-րդ տեղը: Այսինքն, այդ երկրում մարդու իրավունքները, իրավական պետությունը ընդամենը միֆ է: Այնպիսի երկիր է, որ «Աշխարհի ազատության քարտեզում» գտնվում է հետամնացության գոտում. 7 բալանոց սանդղակում Ադրբեջանը գնահատվում է 5,5 միավորով: Այսինքն, քաղաքական իրավունքներն ու անձնական ազատությունները բացակայում են: Այնպիսի երկիր է, որ Մամուլի ազատության ինդեքսում 179 երկրների մեջ 156-րդն է: Այսինքն, այնտեղ աճում է գրաքննությունը, սպառնալիքները, վախը և այլն: Այնպիսի երկիր, որ Amnesty International կազմակերպության վերջին զեկույցում ներկայացվում է որպես «բռնապետական»: Այսինքն, այդտեղ սովորական են ընդդիմության նկատմամբ ճնշումները, ոստիկանների կողմից բռնությունները, պատվերով ձերբակալությունները, խոշտանգումները: Այնպիսի երկիր է, որը Transparensy International-ի ցուցակում վերջին տեղերում է գտնվում՝ զբաղեցնելով 139-րդը 176 երկրների շարքում: Այսինքն, համատարած կաշառք, կոռուպցիա… Եվ այդ երկրի անունը Ադրբեջան է: Առաջնորդի անունն էլ` Իլհամ Ալիև»,-գրում է թերթը:

Ինչպես նշվում է հոդվածում՝ Ալիևը նախագահական ընտրություններից մեկ շաբաթ անց ստացավ Թուրքիայի պետական շքանշան և ոչ թե մարդու իրավունքների, ժողովրդավարության, արադարության և ազատության ապահովման, այլ երկու երկրների միջև հարաբերությունների զարգացման համար: Այսինքն, նավթ, գազ, խողովակաշար և այլն:

http://www.panorama.am/am/region/2013/11/19/dictator-aliev/