Թուրքիայում Դիարբեքիրի կենտրոնական շրջանը կարող են կոչել «Տիգրան Ամեդ»

Թուրքական «Հաբերլեր» լրատվական պորտալը նշում է, թե իշխող Արդարություն և զարգացում կուսակցությունը «Ժողովրդավարացման փաթեթի» շրջանակներում կարգադրել է փոխել Արևմտյան Հայաստանի մի շարք թուրքականացված տեղանունները՝ դրանք, սակայն, համապատասխանեցնելով քրդական տարբերակներին։

Վերջին շրջանում հաճախ է խոսվում, որ Թուրքիայի ազգային մեծ ժողովի քուրդ պատգամավորները դիմում են խորհրդարանին՝ ներկայիս Թուրքիայի արևելյան և հարավարևելյան մի շարք շրջանների (այսինքն՝ Արևմտյան Հայաստանի) տեղանունները քրդական տարբերակով փոխելու համար։

«Հաբերլեր» կայքն էլ նշում է, որ Թուրքիայի կառավարությունն արդեն հանձնարարել է երկրի ներքին գործերի նախարարությանը կատարել անվանափոխությունը։

Ըստ նույն աղբյուրի՝ Դիարբեքիր նահանգը (Աղնձիք) վերանվանվելու է Ամեդ, Էրզրումը (Կարինը)՝ Էրզերոմ, Բիթլիսը (Բաղեշ)՝ Բեդլիս, Բինգյոլը (Բյուրակն)՝ Ջևլիհգ, Հաքքարին՝ Ջոլեմերգ։

Փոխվելու են նաև շրջանների անունները։ Հատկապես հետաքրքիր է Դիարբեքիրի Սուր շրջանի անփանափոխությունը։ Այն կրելու է Տիգրան Ամեդ (Dikran Amed) անվանումը, որը, ըստ ամենայնի, կապված է Տիգրանակերտ հայկական քաղաքի հետ։

Թաթվանը կոչվելու Թեթվան, Հընըսը (Խնուս)՝ Խընուս։ Ավելի վաղ հայտնի էր դարձել, որ առաջարկվում էր փոխել Վանի գրությունը, այսինքն՝ ներկայիս Van-ի փոխարեն գրել քրդական տարբերակով՝ Wan, իսկ Աղրը նահանգը (Արարատ)՝ Ագիրի։

Ձեզ ենք ներկայացնում «Հաբերլերի» ներկայացրած փոփոխությունները լատինատառ գրությամբ (առաջինը թուրքական անվանումն է, երկրորդը նոր անվանումը քրդերենով)։

Նահանգներ՝

Diyarbakır: Amed

Van: Wan,

Bitlis: Bedlis

Hakkari: Colemêrg

Bingöl: Cewlihg

Erzurum: Erzerom

Շրջաններ՝

Sur: Dikran Amed

Bağlar: Rezan

Yenişehir: Bajare Nuh

Silvan: Miya Farqin

Kulp: Pasur

Dicle: Piran

Adilcevaz: Elcewaz,

Güroymak: Norşen,

Tatvan: Tetwan,

Ahlat: Xelat

Tekman: Tatos,

Hınıs: Xınus

allTurkey.am