Կեսարիայի Սուրբ Աստվածածին եկեղեցին կվերակառուցվի ու կդառնա ցուցասրահ

Թուրքիայի Կայսերի (պատմական Կեսարիա) քաղաքում մոտ 40 տարի որպես մարզական կենտրոն ծառայած հայկական Սուրբ Աստվածածին եկեղեցու վերակառուցման ընթացքում փակցված ցուցապաստառի «եկեղեցի» գրությունը քաղաքացիների զայրույթն է հարուցել։

Ինչպես տեղեկացնում է «Ակօս» պարբերականը, «Եկեղեցու վերակառուցման աշխատանքներ» ցուցապաստառի դեմ հնչած քննադատություններից հետո ցուցանակը փոխվել է, և տեղադրվել է «Մշակույթի և արվեստի կենտրոնի շինարարություն» գրությունը։

Եկեղեցին մոտ 40 տարի ծառայել է որպես մարզական միջոցառումների անցկացման վայր։

Կայսերիի բնակիչները տեղի ունեցածը կապում են վարչապետ Ռեջեփ Թայիփ Էրդողանի վերջին հայտարարության հետ այն մասին, որ ճանապարհ կառուցելու համար, եթե հարկ լինի, մզկիթ էլ կքանդեն։

«Ակօս»-ի հետ զրույցում Կայսերիի քաղաքապետարանի ներկայացուցիչը տեղեկացրել է, որ ներկայում քաղաքում վերակառուցվում է 20 պատմական շինություն, և տարիներ շարունակ որպես մարզական կենտրոն ծառայած Սուրբ Աստվածածին եկեղեցին վերածվելու է ցուցասրահի։

Նա նշել է, թե քանի որ եկեղեցին հայկական ճարտարապետության նմուշ է, վերակառուցման համար հայ ճարտարապետի հետ են համագործակցելու։ Վերակառուցվելու է նաև դեռևս գործող Սուրբ Գրիգոր Լուսավորիչ եկեղեցին։

Պաշտոնյան հայտարարել է, որ առաջին պաստառը պարզապես իրենց ցուցանիշներին չէր համապատասխանում և փոխվել է միայն այդ պատճառով։

http://www.tert.am/am/news/2013/11/15/kesaria-church/