Էրզրումում ակցիայի մասնակիցները փորձել են վիրավորել հայ բառով

Ներկայիս Թուրքիայի Էրզրումում (հայկական Կարինը) թուրք ազգայնականները բողոքի ակցիա են անցկացրել, որում դեմ են արտահայտվել քուրդ պատգամավորների՝ Էրզրումի անունը փոխելու առաջարկին։

Մասնավորապես, Թուրքիայի ազգային մեծ ժողովի քրդական Խաղաղություն և ժողովրդավարություն կուսակցությունից պատգամավոր Ալթան Թանը խորհրդարանին մի առաջարկ էր ներկայացրել, որում պահանջում էր անվանափոխել Էրզրում՝ տալով նրան Էրզերոմ անունը։

Այս քայլի դեմ էլ «Թուրքիայի հասարակություն դու ես» անունը կրող կազմակերպությունն Էրզրումում բողոքի ակցիա է անցկացրել, որի ժամանակ անվանափոխման հեղինակներին փորձել են վիրավորել «հայ»բառով։

Ակցիայի մասնակիցները բղավել են «Դուք բոլորդ հայեր եք», իսկ «Թուրքիայի հասարակություն դու ես» կազմակերպության ղեկավար Մուֆիթ Բայրաքթարը նշել է, թե «սա «Մեծ Հայաստան» նախագծի ներքո Հայոց ցեղասպանության 100-րդ տարելիցի պատրաստություն է, ինչն իրենք թույլ չեն տա»։

Հիշեցնենք, որ քուրդ պատգամավորներն առաջարկում է քրդերեն տարբերակով անվանափոխել Արևմտյան Հայաստանի մի շարք բնակավայրերի անուններ, որոնք ներկայում ունեն թուրքական անվանումներ։

Հավելենք նաև, որ մերօրյա Թուրքիայում «հայ» բառը շարունակում է որպես վիրավորանք և հայհոյանք օգտագործվել։

allTurkey.am