Թուրքիայի արտաքին գործերի նախարարության մամլո խոսնակ Լևենթ Գյումրյուքչյուն Բաքվում Թուրքիայի դեսպանատանը հանդես է եկել հայտարարությամբ` հերքելով նախօրեին թուրքական մամուլում տարածված այն լուրերը, թե հայ–թուրքական սահմանը բացելու համար Թուրքիան կփորձի համոզել Ադրբեջանին:
Ըստ Թուրքիայի ԱԳՆ պաշտոնական կայքի` Գյումքյուքչյուն, պատասխանելով այն հարցին, թե ճիշտ են արդյոք լուրերը, որ Ահմեթ Դավութօղլուն խորհրդարանում հայտարարել է, որ Հայաստանի հետ սահմանը բացելու համար իրենք կփորձեն Ադրբեջանին համոզել, ասել է.
«Այդ լուրերը ճիշտ չեն, և պետք չէ կարևորություն տալ դրանց: Մենք այս հարցում գործում ենք Ադրբեջանի հետ համագործակցությամբ և փոխհամաձայնությամբ և նրանց հետ քննարկում ցանկացած զարգացում: Եվ սա պետք է ընկալել ոչ թե այնպես, կարծես մի կողմը մյուսին համոզում է, այլ փոխհամաձայնությամբ արվող աշխատանքներ»:
Նա նաև նշել է, որ Թուրքիան ցանկանում է ղարաբաղյան խնդրի հնարավորինս արագ լուծումը և պատրաստ է անել տարածաշրջանային խաղաղությանը աջակցող ամեն տեսակի քայլ:
Հիշեցնենք, որ թուրքական առաջատար պարբերականներում տեղեկացնում էին, որ Թուրքիայի արտաքին գործերի նախարար Ահմեթ Դավութօղլուն, խորհրդարանի արտաքին հարաբերությունների հանձնաժողովի առաջ հանդես գալով, անդրադարձել է հայ-թուրքական սահմանի խնդրին և ասել, որ առաջիկայում այցելելու է Ադրբեջան և եթե ստացվի Բաքվին համոզել սահմանի բացման հարցում, ապա կկարողանան անակնկալ մատուցել Հայաստանին:
Leave a Reply