Թուրքական պատմագիտական ընկերությունը սկսել է մեծ աշխատություն գրել հայ–թուրքական հարաբերությունների պատմական զարգացումների վերաբերյալ: Ընկերության հայտարարությամբ՝ այս նախաձեռնության նպատակն է «ընդդեմ Թուրքիայի միջազգային օրակարգ բերված հարցերը միջազգային հանրությանը ներկայացնել պատմական ճշմարտությանը համապատասխան և այնպիսի ֆիլմեր ու վավերագրական նյութեր նախապատրաստել, որոնք արձագանք կգտնեն միջազգային ասպարեզում»:
Աշխատությունն ընդգրկելու է երկու երկրների հարաբերությունների պատմությունը, ինչպես նաև այնպիսի հոդվածներ, որոնք դիտարկում են հայ-թուրքական առնչությունների սոցիալական ասպեկտները: Բացի այդ՝ ժողովածուի մեջ ներառվելու են հայ-թուրքական հարաբերություններին անդրադարձած մի շարք մասնագետների գրչին պատկանող մեկնաբանություններ: Թուրքական «Զամանի» հաղորդմամբ՝ այս հրատարակությունը յուրատեսակ նախապատրաստություն է` 2015 թվականին ընդառաջ:
Նշենք, որ Թուրքական պատմագիտական ընկերությունը հիմնադրվել է 1931 թվականին Թուրքիայի Հանրապետության առաջին նախագահ Մուստաֆա Քեմալ Աթաթուրքի նախաձեռնությամբ և կարգադրությամբ: Ընկերությունը, մշակելով թուրքական պաշտոնական պատմագրության մեզ հայտնի թեզերը, հանդիսանում է պատմական կեղծարարությամբ զբաղվող խոշոր մի կառույց:
Leave a Reply