Ստամբուլում կայացել է Թաթուլ Հակոբյանի գրքերի շնորհանդեսը

Նոյեմբերի 5-ին Ստամբուլի «Ջեզայիր» կենտրոնում կայացել է լրագրող, «Սիվիլիթասի» վերլուծաբան Թաթուլ Հակոբյանի «Կանաչ ու սև» և «Հայերը և թուրքերը» գրքերի թուրքերեն և անգլերեն հատորների շնորհանդես–վաճառքը։

Այն կազմակերպել էր «Անադոլու Քյուլթուր» կենտրոնի ղեկավար Օսման Քավալան` համագործակցությամբ «Ժամանակ» թերթի խմբագիր Արա Քոչունյանի։ Ներկաներին Թաթուլ Հակոբյանի և նրա գրքերի մասին տեղեկություններ է փոխանցել Քոչունյանը։ Ապա հեղինակն անգլերենով հակիրճ ներկայացրել է իր գրքերի բովանդակությունը` հատկապես կարևորելով Ստամբուլի այս շնորհանդեսը։

Ներկա էին Պոլսում հրատարակվող հայկական թերթերի աշխատակիցներ, «Բի-Բի-Սի»-ի թուրքական ծառայությունից լրագրող, ինչպես նաև փորձագետներ և դիվանագետներ։

«Յուրաքանչյուր կոնֆլիկտ ունի առնվազն երկու կողմ։ Ես չեմ կարող հավակնել ամենաանաչառ հեղինակի տիտղոսին, սակայն երկու գրքերում էլ փորձել եմ ներկայացնել փաստեր, իրադարձություններ՝ մեկնաբանությունները թողնելով ընթերցողին։ Կարծում եմ` թուրք ընթերցողը հետաքրքրությամբ կկարդա այս հատորները և նոր մանրամասներ կհայտնաբերի ինչպես հայ-թուրքական դիվանագիտական հարաբերությունների պատմությունից, այնպես էլ արցախյան հակամարտությունից»,- ասել է Հակոբյանը։

Նրա ելույթից հետո եղել են հարց ու պատասխաններ, ապա ծավալվել է քննարկում։

Վերջում Թաթուլ Հակոբյանը մակագրել է իր նորատիպ հատորները։

http://civilnet.am/2013/11/06/tatul-hakobyan-books-presentation-in-istanbul