Դիարբեքիրում ապամոնտաժել են «Երջանիկ է նա, ով ասում է՝ թուրք եմ» գրությունը

Ներկայիս Թուրքիայի քրդաբնակ Դիարբեքիր քաղաքում (հայկական Աղձնիք նահանգ) ապամոնտաժվել է «Երջանիկ է նա, ով ասում է՝ թուրք եմ» գրությունը, որը երկար տարիներ տեղադրված է եղել քաղաքապետարանի շենքի հարևանությամբ։

«Երջանիկ է նա, ով ասում է՝ թուրք եմ» (Ne Mutlu Türküm Diyene) արտահայտությունը պատկանում է Թուրքիայի առաջին նախագահ Մուստաֆա Քեմալ Աթաթուրքին և թուրքական պետական քարոզչամեքենայի կարևոր բաղադրիչներից է։ Այս գրությունը կարող եք տեսնել Թուրքիայի տարբեր անկյուններում՝ քաղաքներում, գյուղերում, դպրոցներում, մասնավոր և պետական կառույցներում։

Թուրքական մամուլի ուշադրությունն էլ գրավել է, որ քրդաբնակ Դիարբեքիրում երեք տասնամյակից ավել մնացած թուրքական ազգայնական գրությունն ապամոնտաժվել է։ Գրությունն ուներ շուրջ 20 մետր երկարություն և տեղադրվել էր 1980 թվականի հեղաշրջումից հետո։ 

Նշենք, որ Թուրքիայի կառավարությունը ներկայում փորձեր է անում ընդլայնել քրդերի իրավունքները, նրանց տալ որոշակի ազատություններ։

allTurkey.am