2009 թվականից Հրանտ Դինքի անվան հիմնադրամն իրականացնում է «Թուրքիա–Հայաստան լրագրողների երկխոսություն» ծրագիրը, որի շրջանակներում այս տարի Հայաստանից մասնակցող լրագրողներն այցելել են Դիարբեքիրի` ազգությամբ քուրդ քաղաքապետ Օսման Բայդեմիրին:
Դիարբեքիրի քաղաքապետը, բարձր գնահատելով հիմնադրամի գործունեությունը, նշել է, որ նման կերպ շարունակվում է Դինքի գործունեությունը:
Հայ լրագրողներին ընդունելով՝ Բայդեմիրը կրկին ընդգծել է. «Դիարբեքիրը որքան իմ, նույնքան էլ հայերի, եզդիների և ալևիների քաղաքն է: Բարով եք եկել ձեր քաղաք»:
Խոսելով Դիարբեքիրը Ս. Կիրակոս եկեղեցու վերանորոգման մասին՝ քաղաքապետն ընդգծել է, որ նման որոշմամբ քաղաքի ղեկավարությունն անցյալի բացասական մտածելակերպը մերժելու նպատակ է ունեցել: «Մեր բոլոր ջանքերը միտված են ստեղծել այնպիսի ապագա, որտեղ բոլորը կկարողանան ազատորեն արտահայտել իրենց մտքերը, խոսել իրենց մայրենի լեզվով, ունենալ խղճի և դավանանքի ազատություն », – ասել է Բայդեմիրը:
Leave a Reply