Իսլամացած հայերի թեմայով Ստամբուլում անցած գիտաժողովը վկայում է ժողովրդավարության առումով Թուրքիայի առաջադիմության մասին: Այսպիսի կարծիք է հայտնել ֆրանսահայ պատմաբան Ռայմոն Գևորգյանը, որը մասնակցում է Ստամբուլում կիրակի մեկնարկած եռօրյա գիտաժողովին:
Թուրքական Hurriyet Daily News-ի հետ հարցազրույցում պատմաբանն ասել է, որ չի կարծում՝ Թուրքիան 2015թ.` Հայոց ցեղասպանության 100-րդ տարելիցին ընդառաջ, ինչ-որ քայլեր կձեռնարկի` առկա դոգմաները վերացնելու ուղղությամբ:
«Թուրքիան դրականորեն փոխվում է, և անարդար կլինի պարզել, որ այս գիտաժողովը դրա արդյունքը չէ»,- ասել է պատմաբանը նոյեմբերի:
Ողջունելով արխիվների բացումը՝ Գևորգյանն ասել է, որ այդուհանդերձ չի ակնկալում, որ Թուրքիան վճռական քայլերի կդիմի մինչև Հայոց ցեղասպանության 100-րդ տարելիցը, որը Սփյուռքում ընկալվում է որպես շրջադարձային պահ:
«2015-ը դոգման կոտրելու հնարավորություն է, սակայն չի թվում, որ Թուրքիան այդ ուղղությամբ որևէ բան կանի»,- ասել է նա:
Անդրադառնալով երկու երկրների պատմաբանների մասնակցությամբ հանձնաժողովի ստեղծման գաղափարին՝ Գևորգյանը նշել է, որ դեմ է պետության ղեկավարության ներքո որևէ հանձնաժողովի ձևավորմանը: «Պատմաբանները պետք է անկախ լինեն. նրանք չեն սպասում պետության հավանությանը` աշխատանք սկսելու համար: Բացի այդ` մենք՝ հայ և թուրք պատմաբաններս, գիտաժողովների ժամանակ հանդիպում ենք և համագործակցում: Ավելին՝ Հայոց ցեղասպանության փաստը քննարկելու անհրաժեշտություն չկա, քանի որ արդյունքն ակնհայտ է: Հայոց ցեղասպանությունն իրականություն է, որը ճանաչվել է միջազգային հանրության կողմից»,- ասել է նա:
http://civilnet.am/2013/11/04/raymond-kevorkian-interview-hurriyet
Leave a Reply