Թուրքիայի գլխավոր ընդդիմադիր Ժողովրդահանրապետական (CHP) կուսակցության առաջնորդ Քեմալ Քըլըչդարօղլուն, ում մայրը ըստ պնդումների հայ է, թուրքական Taraf-ի հետ զրույցում պատասխանել է նաեւ Ցեղասպանության հետ կապված հարցին։
Թուրքական Taraf-ի լրագրողը հարցրել է Քեմալ Քըլըչդարօղլուին, թե ինչպես նա կմեկնաբաներ 1915 թվականին տեղի ունեցածը։
1915-ին այս հողերում հայ ժողովուրդ կար, սակայն հիմա չկա։ Հայ ժողովրդի գլխին եկածը մեկնաբանելու համար ի՞նչ որակում կտաք դրան։
1915-ին տեղի ունեցածը դիտում եմ որպես Օսմանյան պատմության դրամատիկ իրադարձություններից մեկը։ Դեհ, չտեսնելն անհնարին է։ Բայց այդ խնդրում չենք հավատում, որ բավականաչափ աղբյուրներ եւ արխիվներ են բացվել։ Ոչ միայն օսմանյան, այլ նաեւ ռուսական եւ հայկական արխիվներն են անհրաժեշտ բացել։
Այսինքն, դրամատի՞կ եք ասում։
Անշուշտ, երբ նայում ենք այդ օրերին մարդկանց պայմաններին, ինչպես էին մի շրջանից մյուս շրջան ուղարկում, հազարավոր մարդիկ մահանում էին, կին, տղա, երեխա եւ այլք… Երբ նայում ես, հասկանում ես, որ դրամատիկ մի իրավիճակ է։
Մոտենում է 2015-ը (Հայոց ցեղասպանության 100-րդ տարելիցը), որպես կուսակցություն` ի՞նչ եք մտածում անել։
Եթե ուզում եք ճիշտը իմանալ, ասեմ> մեզ Թուրքիայի ԱԳՆ-ից ասել են, որ որոշ պատրաստություններ են տեսել։ Որպես կուսակցություն` մեր տեսակետն այն է, որ այդ իրադարձությունները պետք է պատմաբանները օբյեկտիվ կերպով լուսաբանեն հասարակության համար։ Այդ համատեքստում, եթե բացվեն արխիվները, բոլոր մանրամասնություններն իմանալու հնարավորություն կլինի։ Մենք էլ կիմանանք, հասարակությունն էլ կիմանա, պատմաբաններն էլ կիմանան։
Նշենք, որ 2 տարի առաջ, երբ Քեմալ Քըլըչդարօղլուն դարձավ կուսակցապետ, նրա հակառակորդները փորձում էին նրա վարկանիշին խփել՝ վիրավորական ենթատեքստով հայտարարելով, թե նրա մայրը հայ է։
Մի առիթով թուրքական Milliyet-ի թղթակցի հետ զրույցում Քեմալ Քըլըչդարօղլուն նշել էր, թե հնարավոր է, որ իր մայրը հայ է։ «Իմ ընտանիքի էթնիկ ինքության վերաբերյալ հարցաքննություն անելը հակասում է մարդու իրավունքներին։ Մայրս կարող է եւ հայ է»,-ասել էր Քըլըչդարօղլուն։
Leave a Reply