Ստամբուլում մեկնարկել է «Իսլամացած հայերը» թեմայով գիտաժողովը

Ստամբուլում մեկնարկել է «Իսլամացած հայերը» թեմայով գիտաժողովը: Այն կազմակերպվել է Հրանտ Դինք հիմնադրամի կողմից և տեղի կունենա նոյեմբերի 2-4-ը՝ Բողազիչի համալսրանում:

Գիտաժողովի նպատակն է մի կողմից հասկանալ և ներկայացնել իսլամացած հայերի ապրած դժվարությունները ու դրանց հետևանքները, մյուս կողմից՝ ուսումնասիրել և քննարկել այս խնդրի շուրջ առկա լռության շերտերն ու այդ լռության խախտման գործընթացը:

Ինչպե՞ս են ապրել իսլամացած հայերը, ինչպե՞ս են հաղթահարել դժվարին փորձությունները, և ինչպե՞ս են դրանք անդրադարձել իրենց սերունդների վրա, ինչպե՞ս են ձևավորվում ինքնության և ազգային պատկանելության հասկացողությունները, ինչպե՞ս են ներկայում տեղի ունեցող քաղաքական զարգացումները, և լարված իրավիճակը ազդում նրանց կյանքի վրա, ինչպե՞ս կարելի է հասկանալ իսլամացած հայերի լուռ կեցվածքը, ինչու՞ է այդքան երկար ժամանակ պահանջվել, որպեսզի մեզ հասանելի դառնան իսլամացած հայերի պատմությունները, և ինչու՞ են նրանց անցած դժվարությունների մասին մեր գիտելիքներն այդքան սահմանափակ, ինչու է՞ այսօր հետաքրքրությունն աճում կենդանի մնացածների հենց այս հատվածի հանդեպ:

Այս և այլ հարցերի անդրադառնալով՝ գիտաժողովը նպատակ ունի նպաստել 1915թ. (Հայոց ցեղասպանության–Ակունքի խմբ.) և դրա հետևանքների վերաբերյալ պատմական բանավեճերին և ազգային ինքնությանը, գենդերային, պատասխանատվության և արդարության խնդիրներին: Գիտաժողովի հիմնական նպատակներից մեկն է նաև ներկայացնել անցյալի և ներկայի բռնության, խտրականության և անարդարության փորձառությունը:

http://civilnet.am/conference_in_istanbul

Akunq.net-Խորհրդաժողովին ուղիղ եթերով կարող եք հետևել հետևյալ կայքէջով.

http://www.hrantdink.org/?Detail=753&Lang