Թուրքիայում հայ լուսանկարիչների արխիվային լուսանկարների ցուցահանդես է բացվել

Թուրքիայում՝ Ամասիայի շրջանի Մերզիֆոն բնակավայրում, բացվել է այստեղ բնակված հայ Դիլդիլյան եղբայրների 1872-1923 թթ. արված լուսանկարների ընտանեկան արխիվի ցուցահանդեսը, տեղեկացնում է թուրքական «Դողան» գործակալությունը։

Ընտանիքի թոռներից արդեն երրորդ սերնդի ներկայացուցիչ Արմեն Ցոլակ Մարսուբյանի կողմից հավաքված լուսանկարներն ավելի վաղ ցուցադրվել էին Ստամբուլում։ Այս անգամ ցուցահանդեսը բացվել է Ցոլակ և Արամ Դիլդիլյան եղբայրների ծննդավայր Մերզիֆոնում։

Ցուցահանդեսի ընթացքում ներկայացվել է շուրջ 600 լուսանկար, որոնք արվել են 1872-1923թթ.՝ Սըվասում, Ամասիայում, Քոնյայում, Մերզիֆոնում։ Բացման արարողությանը մասնակցել է նաև Մերզիֆոնի քաղաքապետ, իշխող  Արդարություն և զարգացում կուսակցության անդամ Իսքենդեր Դողրուն։

«Ընտանիքիս պատկանած լուսանկարները բերել եմ նրանց հայրենիք և շատ երջանիկ եմ դրանք այս հողերին ծանոթացնելուս համար»,-ասել է Արմեն Ցոլակ Մարսուբյանը։

http://www.tert.am/am/news/2013/10/31/merzifon/