Աբդուլլահ Օջալանի կյանքը վավերագրական ֆիլմ կդառնա

Թուրք հայտնի ռեժիսոր Սենար Թուրգութը քրդական շարժման առաջնորդ Աբդուլլահ Օջալանի կյանքը կվերածի վավերագրական ֆիլմի: Ռեժիսորը փորձելու է ներկայացնել Օջալանի կյանքը՝ սկսած մանկությունից: Նրա դպրոցական տարիների, լավ աշակերտ լինելու մասին է պատմելու Ուրֆայի թուրքմենական գյուղերից մեկում ապրող նրա առաջին ուսուցիչ Ֆուադը: Օջալանի մասին կխոսեն նաև նրա ընտանիքի անդամներն ու ընկերները:
«Թարաֆ» թերթի հաղորդմամբ՝ ռեժիսոր Թուրգութը ֆիլմի նկարահանումներին նախապատրաստվելու համար հետազոտություններ է կատարել և նյութեր հավաքել: Օջալանի կայնքն ուսումնասիրելիս ռեժիսորին ամենից շատ զարմացրել է նրա ընտանիքի ծայրաստիճան աղքատությունը: «Միլիոնավոր դոլարներ ունեցող մի կազմակերպության առաջնորդ հանդիսացող Աբդուլլահ Օջալանի եղբայրը՝ Մեհմեդ Օջալանը, ապրում է Ուրֆայի շրջանի Օմերլի գյուղում: Երկու ամուսնությունից 12 երեխա ունի: Ընկույզի ծառեր են մշակում, սակայն դրանցից ստացված եկամուտը երկու հոգու էլ չի բավականացնում: Անգամ հաց գնելու խնդիր ունեն: Նրանք ապրում են 70 տարի առաջ հոր՝ Օմեր Օջալանի կառուցած տանը, ուր ծնվել է Աբդուլահ Օջալանը»,-պատմել է ռեժիսոր Թուրգութը:

http://ankakh.com