Թուրքիայում պատրաստվում են հանել մի շարք տառերի արգելքը, ինչը գործում է արդեն մի քանի տասնամյակ և հիմնականում կապված է քրդերենի կիրառումը սահմանափակելու հետ։
Թուրքիայի կառավարության պատրաստած նոր օրենսդրական փաթեթով, որը ներկայացվելու է երկրի խորհրդարանին, թույլատրվելու է ազատորեն օգտագործել Q, X, W տառերը, որոնք բացակայում են թուրքերենի այբուբենում, սակայն կիրառվում են քրդերենում։
Այս մասին տեղեկացնում է թուրքական «Ռադիքալ» պարբերականը՝ նշելով, որ փոփոխությունները ներկայացվելու են առաջիկա օրերին։
Այս տառերը թուրքական օրենքներով արգելվել էին դեռ 1928 թվականին։ Քրդերի համար սա լուրջ բարդություններ ու բողոքներ էր առաջ բերում, քանի որ նրանք չէին կարողանում իրենց ազգային անունները տալ երեխաներին, իրենց բնակավայրերին և այլն։
Թուրքիայում բնակվող քրդերի՝ իրենց լեզվով ցուցանակներ պատրաստելը նույնպես հետապնդվում էր թուրքական պետության կողմից։
Նշենք, որ և թուրքերենը, և քրդերենն օգտագործում են լատինատառ այբուբենը, սակայն թուրքերենում բացակայում են մի քանի տառեր, որոնք կիրառվում են քրդերենում։
allTurkey.am
Leave a Reply