Ստամբուլում տեղի կունենա «Իսլամացած հայերը» թեմայով կոնֆերանս

«Հրանտ Դինքի» անվան հիմնադրամը Ստամբուլի Բողազիչի համալսարանի պատմության ֆակուլտետի հետ համատեղ նոյեմբերի 2-ից 4-ը կանցկանցի կոնֆերանս` «Իսլամացած հայերը» թեմայով:

Ինչպես հաղորդում է «Ակօսը», կոնֆերանսին մասնակցելու են աշխարհի չորս կողմերից եկած գիտնականներ և մասնագետներ, որոնք քննարկելու են վերջին տարիներին հետզհետե ավելի շատ արծարծվող այս հարցը: Այսպիսով Հայոց ցեղասպանության քիչ ուսումնասիրված կողմը հանրությանը կներկայացվի երեկվա և այսօրվա տեսանկյունից:
Իսլամացած, ավելի ճիշտ իսլամացված հայերի խնդիրը բավական բազմաշերտ և խճճված է: Կոնֆերանսի մանրամասների մասին է խոսել միջոցառման կազմակերպիչ հանձնաժողովի անդամ Այշե Գյուլ Ալթընայը, որը Ֆեթիյե Չեթինի հետ միասին հեղինակել է իսլամացած հայերի խնդիրը բազմակողմանիորեն լուսաբանող «Թոռներ» գիրքը: «Որոշ պատմաբանների կարծիքով՝ 1915 թվականի և դրան հաջորդած կոտորածներից ու աքսորից փրկվելու համար մոտ 200 հազար հայ է իսլամացել: Հնարավոր չէ իմանալ նրանց ստույգ թիվը, սակայն այս վիճակագրությունը մեզ մոտավոր պատկերն է ներկայացնում»,-նշել է Ալթընայը: Վերջինս ասել է, որ Հայաստանի և հայկական սփյուռքի համայնքները մինչև վերջերս չեն քննարկել իսլամացվելով ցեղասպանությունից փրկվածների թեման և չեն ուսումնասիրել այն: Խնդրի շուրջ գիտական աշխատությունները, հրատարակված հուշագրություններն ու գրական ստեղծագործությունները միայն վերջին մի քանի տարում են ի հայտ եկել: Ահա այս կոնֆերանսը դառնալու է միջազգային այն առաջին ընդգրկուն հանդիպումը, որը ներկայացնելու է այս խնդիրը:

http://ankakh.com