Հեյբելիադայի հոգևոր դպրոցում համերգ անցկացվեց

Ստամբուլի Հեյբելիադա կղզու հույն ուղղափառ եկեղեցու հոգևոր դպրոցում համերգ է անցկացվել։ Դպրոցի հիմնանորոգումից հետո սեպտեմբերի 22-ին կազմակերպված համերգին մասնակցել է Հունաց պատրիարք Բարդուղիմեոսն ու Բուլղարիայի պատրիարք Նեոֆիտոսը։

Միջոցառմանը ելույթ են ունեցել հույն և թուրք երաժիշտներ, իսկ թուրքական մամուլն այն կոչել է «Թուրք-հունական բարեկամության համերգ»։

Հիմնանորոգման աշխատանքները կազմակերպել էին Պոլսի հույն պատրիարքարանը, իսկ դրանք իրականացրել էին Սալոնիկի Արիստոտելի անվան համալսարանի ճարտարապետության բաժնի մասնագետները: Առայժմ, սակայն, թուրքական իշխանությունները դպրոցին վերջնականապես թույլ չեն տվել` գործել իր իրական նշանակությամբ, այն է՝ որպես հոգևոր դպրոց։

Հեյբելիադայի հոգևոր դպրոցը երկար տարիներ չի գործում: Ստամբուլի փոքրաթիվ հույն համայնքն ու հույն պատրիարքարանը փորձեր են ձեռնարկում` վերագործարկել Անկարայի որոշումով փակված կրոնական կրթարանը:

Հեյբելիադայի հոգևոր դպրոցը բացվել է 1844 թվականին: 1894 թվականին այն լուրջ վնասվել է երկրաշարժի հետևանքով, և այնտեղ երկու տարի շինարարություն է ընթացել: 1971 թվականին Թուրքիայի իշխանությունների որոշումով հոգևոր դպրոցը դադարեցրել է աշխատանքը` փակ մնալով մինչ օրս:

http://haynews.am/hy/1379923809