Թուրք պատմաբան. «Հայերը, հողեր գնելով, պետություն հիմնելու նպատակ էին հետապնդում»

Սեպտեմբերի 23-26-ին Թուրքիայի Իմամօղլու շրջանում տեղի է ունենալու բացօթյա ցուցահանդես, որի ժամանակ պատմաբան Ջեզմի Յուրթսեվերը ցուցադրելու է  Չուկուրովայի պետական ագրարատնտեսության վաճառքի փաստաթղթերը և պատմական լուսանկարներ:

Թուրքական «Զաման» թերթը  մեջբերում է պատմաբանի հաղորդած տեղեկությունները, ըստ որոնց` Չուկուրովայի տարածքը պետականցվել,  և այնտեղ ագրարային տնտեսություն ստեղծվել է 1890-ական թթ.,  օսմանյան սուլթան Աբդուլհամիդ 2-րդի կողմից: 1912 թ. այն վաճառվել է ֆրանսիական «Լեսե» ընկերությանը:

Ինչպես պարզ է դառնում պատմաբանի տեղեկություններից,  այդ հողատարածքը պետականացնելու հիմնական պատճառներից մեկը հայերն են եղել:

«1880-1885թթ. Աբդուլհամիդ 2-րդը Ադանայի նահանգապետ է նշանակել Աբիդին փաշային: Վերջինս հասկացել է, որ օտարերկրացիները և նրանց հետ գործ ունեցող հայ առևտրականները, Չուկուրովայի հողերը գնելով, Կիլիկյան Հայաստան պետություն հիմնելու քաղաքական նպատակ էին հետապնդում»,- ընդգծել է  պատմաբան Ջեզմի Յուրթսեվերը: 1890-ականներին արդեն Մերջիմեք, Քոզան, Իմամօղլու, Ջեյհան և Յուրեղիր գավառներն ընդգրկող  տարածքը հայտարարվեց պետական սեփականություն, իսկ օտարերկրացիներին արգելվեց հող վաճառել` առանց պետության թույլտվության:

Սուլթան Աբդուլհամիդ 2-րդին պատկանող Չուկուրովայի ագրարային տնտեսությունը 1912 թվականին 75 տարի շահագործման իրավունքով վաճառվել էր  ֆրանսիացիներին:

http://ermenihaber.am/?lang_id=2&news_=7&cur_news=843