Հայաստանի հետ լավ հարաբերությունները կարեւոր էին Թուրքիայի համար, քանի որ դրանք որոշակիորեն կնվազեցնեին Երեւանի հակաթուրքական քարոզչությունը: Այս մասին, թուրքական «Today’s Zaman»-ին տված հարցազրույցում նշել է Թուրքիայի ԱԳ նախկին նախարար Իլթեր Թուրքմենը:
Նա հարցազրույցում անդրադարձել է Անկարայի արտաքին քաղաքականության հիմնական խնդիրներին, այդ թվում Թուրքիայի՝ հարեւանների հետ հարաբերություններին: Նրա խոսքով՝ արտաքին քաղաքական կուրսի սխալներից մեկը Իսրայելի հետ հարաբերություններն են: «Թուրքիան ազդեցիկ երկիր էր Մերձավոր Արեւելքում, քանի որ լավ հարաբերություններ ուներ ինչպես Իսրայելի, այնպես էլ արաբական երկրների հետ եւ կարողանում էր կարեւոր դեր խաալ»,-ասել Թուրքմենը:
Դիվանագետը նշել է, որ դեռեւս առկա է Հայաստանի հետ խնդիրը: «Թեեւ Հայաստանի հարցում դրական քայլեր ձեռնարկվեցին, բայց այդ ջանքերը ձախողվեցին: Հայաստանի հետ լավ հարաբերությունները կարեւոր էին Թուրքիայի համար, քանի որ դրանք որոշակիորեն կնվազեցնեին Երեւանի հակաթուրքական քարոզչությունը: Թուրքիան կարող էր նաեւ ավելի ակտիվ դեր խաղալ ԼՂ խնդրի կարգավորման հարցում»,-ընդգծել է նա:
Ընդհանուր առմամբ, խոսելով Թուրքիայի խնդիրների մասին, նախկին նախարարը ուշադրություն է հրավիրել քրդական խնդրի վրա: «Գլխավոր հարցերից մեկը, որը պետք է լուծի Թուրքիան, քրդական խնդիրն է: Թուրքիան չի ընկալվի որպես ուժեղ երկիր, քանի դեռ կա քրդական հարցը»,-ասել է Թուրքմենը:
Leave a Reply