Հրանտ Դինքի սպանությունից հետո «Հրանտ Դինք» միջազգային հիմնադրամի կողմից ամեն տարի տրվող մրցանակն այս տարի հանձնվել է թուրքական «Շաբաթ օրվա մայրեր» կազմակերպությանն ու Սերբիայից` Նատաշա Կանդիչին:
Ինչպես տեղեկացնում է Ստամբուլի հայկական «Ակօս» թերթը, սեպտեմբերի 15-ի երեկոյան, Ստամբուլի Լյութֆի Քըրդարի անվան սրահում տեղի է ունեցել Հրանտ Դինքի մրցանակի հանձնման արարողությունը, որի բացման խոսքը տրվել է ստամբուլահայ հայտնի ռոք երգիչ Հայկո Ջեփքինին:
Միջոցառման ժամանակ ելույթ է ունեցել Բողազիչի ջազ երգչախումբը, որը կատարել է հայտնի ստեղծագործություններ թուրքերենով, անգլերենով եւ հայերենով:
Միջոցառման վերջում Թուրքիայից եւ արտասահմանից հրավիրված ժյուրիի անդամները հայտնել են Հրանտ Դինքի մրցանակն ստացողների անունները`Թուրքիայից «Շաբաթ օրվա մայրեր» կազմակերպությունը եւ Սերբիայից՝ Նատաշա Կանդիչը:
Նշենք, որ մրցանակն ամեն տարի հանձնվում է մարդու իրավունքների պաշտպանության, խոսքի ազատության համար պայքարող խիզախ հասարակական գործիչներին կամ լրագրողներին:
Leave a Reply