Երիտթուրքական պարագլուխներից Ջեմալ փաշայի թոռը՝ Հասան Ջեմալը, որը հեղինակել է «1915 Հայոց ցեղասպանություն» գիրքը, այսօր «T24» թերթում տպագրված «Ամաչում եմ» վերնագրով իր հոդվածում գրել է Հրանտ Դինքի մասին: «Այնպիսի մարդիկ կան, որոնց կյանքը միայն իրենցը չէ: Նրանց կյանքն ու մահը լայն առումով վերաբերում է ոչ միայն իրենց, այլ այն հասարակությանը, որի մասն են կազմել: Հրանտ Դինքի կյանքն էլ այդպիսին էր: Սիրելի Հրանտը այդպես ապրեց և այնպես մահացավ, որ ճանապարհ բացեց Թուրքիայի մասին նոր հարցեր տալու, նոր պատասխաններ փնտրելու համար: Նա այնպես ապրեց և այնպես մահացավ, որ խոշորացույցի տակ առնվեց այս հողերի երեկվա ու այսօրվա բացահայտումը: Սիրելի Հրանտը այնպես ապրեց և այնպես մահացավ, որ խելք ու խիղճ ունեցող յուրաքանչյուր ոք սկսեց պայքարել այս հողերում ավելի շատ ժողովրդավարության, ավելի շատ իրավունքի, ազատության, մարդու իրավունքների համար բացված ճանապարհների արգելքները վերացնելու համար: Սիրելի Հրանտը իր կյանքով և ողբերգական մահով մեծ հարված հասցրեց Թուրքիայի պետական գաղափարախոսությունը հանդիսացող ազգայնականություն հասկացությանը, որով Թուրքիան սեփական քաղաքացիներին ստի մեջ է պահում: Նա, արագացնելով այս հողերի իրական պատմությունը գրելու գործընթացը՝ զերծ փտած պաշտոնական անձանցից, մի քիչ էլ բացեց պատմության հետ առերեսման դուռը: Ես էլ Հրանտ Դինքի շնորհիվ ավելի ազատ դարձա: Գուցե վերջապես հարված ստացան այն տաբուներն ու շղթաները, որոնք տարիներ շարունակ ինձ ապրեցրել են ստի մեջ՝ գերի վերցնելով գիտակցությունս»,-գրել է Հասան Ջեմալը:
– See more at: http://ankakh.com/%D5%B0%D6%80%D5%A1%D5%B6%D5%BF-%D5%A4%D5%AB%D5%B6%D6%84%D5%AB-%D5%B7%D5%B6%D5%B8%D6%80%D5%B0%D5%AB%D5%BE-%D5%A1%D5%BE%D5%A5%D5%AC%D5%AB-%D5%A1%D5%A6%D5%A1%D5%BF-%D5%A4%D5%A1%D6%80%D5%B1%D5%A1-%D5%B0/#sthash.RosLMjz7.dpuf
Leave a Reply