Թուրքիայում պատմական շենքեր են ապամոնտաժելու հյուրանոց կառուցելու համար

Թուրքական «Բիրգյուն» թերթի թղթակից Օլգու Քունդակչըն ահազանգում է, որ Ստամբուլի Պանգալթը թաղամասում գտնվող պատմական «Ինջի» կինոթատրոնը քանդելու են տեղում հյուրանոց կառուցելու նպատակով: Նախատեսվում է, որ ըստ նախագծի, պետք է քանդվեն Հայ կաթոլիկ Մխիթարյան միաբանության և դպրոցի հիմնադրամին պատկանող տարածքում գտնվող «Ինջի» և «Պանգալթը» առևտրի  տաղավարները, որոնք կառուցվել են 1946 թվականին:

Հիմադրամին պատկանող տարածքում գտնվող 2-3 հարկանի խանութները քանդվելու են, իսկ նույն տարածքում գտնվող և մշակութային արժեք ներկայացնող եկեղեցին և դպրոցը` ոչ: Հիմնադրամն արդեն խանութների վարձակալներին գրավոր կերպով տեղեկացրել է, որ խանութները ապամոնտաժելու պատճառով վարձակալության պայմանագրերը չեն երկարաձգվելու: Որոշ խանութպաններ արդեն վերադարձրել են վարձակալած տարածքները:

Լրագրողը ցավով հայտնում է, որ քանդման ենթակա խանութների մեջ կա նաև 1929 թվականին կառուցված հայտնի կոշկակարանոց, որի տերը՝ Իբրահիմ Վարլիքը, 70 տարի շարունակ աշխատել է նույն տեղում:

«Հիմա ասում են` բանալիները տվե՛ք, գնացե՛ք: Իսկ այս պահին նոր խանութ բացելու հնարավորություն չունենք: Մեր տարիները այստեղ են անցել: Հիմա սպասում ենք, թե ինչ կլինի»,- բողոքել է Վարլըքը:

Նշվում է, որ վերոնշյալ տաղավարները արդեն կիսադատարկ վիճակում են: Իսկ «Ինջի» տաղավարում գտնվող` նախկինում փակված, այժմ` լքված նույնանուն կինոթատրոնի դուռը փակված է նեյլոնե տոպրակով: Այն  նույնպես ապամոտաժելու են:

Ստամբուլի քաղաքապետարանը, չնայած Ժողովրդահանրապետական կուսակցության (ԺՀԿ-CHP) բացասական դիրքորոշմանը, թույլատրել է տվյալ տարածքում նստավայր և հյուրանոց կառուցել:

http://ermenihaber.am/?lang_id=2&news_=4&cur_news=1033