Դիարբեքիրում վերաբացված Սբ Կիրակոս եկեղեցին դեռ փորձում է մարել վերակառուցման պարտքը

Մոտ 100 տարվա ընդմիջումից հետո վերաբացված Դիարբեքիրի Սուրբ Կիրակոս եկեղեցու վերակառուցման աշխատանքների համար ծախսված 5 մլն թուրքական լիրայից մոտ 1.5 մլն լիրան եկեղեցու հիմնադրամը պարտք է մնացել, տեղեկացնում է թուրքական NTV-ն։

Եկեղեցու հիմնադրամի ղեկավար Էրգյուն Այըքը տեղեկացրել է, որ իրենք դիմել են Մշակույթի նախարարություն, որտեղից պատասխանել են, թե գումարը կտան, եթե եկեղեցին փոխանցվի նախարարությանը։

«Այդ դեպքում եկեղեցին որպես թանգարան էր օգտագործվելու, ինչը, սակայն, մեզ համար ցանկալի չէ»,-ասել է նա։

98 տարի անց արարողակարգերի անցկացման համար վերաբացված Սուրբ Կիրակոս հայկական եկեղեցու խնդիրները ոչ մի կերպ չեն ավարտվում։

Եկեղեցու վերակառուցման համար ծախսված 5 մլն թուրքական լիրայից Դիարբեքիրի նահանգապետարանը տվել է 1 միլիոնը։ 2.5 մլն լիրա հավաքվել է հայ համայնքի նվիրատվությունների միջոցով։ Մնացած 1.5 մլն լիրա պարտքն այդպես էլ չի վճարվել։

http://www.tert.am/am/news/2013/09/13/surp-kirakos/