Թուրքիայի Մարդին քաղաքում ապրող ասորի Ջերջիս Քափթանը, ում Բահե են կոչում, 76 տարի է, ինչ ապրում է ասորական եկեղեցու մենաստանում: Երբ Բահեն 11 տարեկան էր, նրա մայրը երեխային պահելու միջոցներ չունենալու պատճառով նրան այստեղ է թողնում՝ մյուս երկու երեխաների հետ մեկնելով Սիրիա: 76 տարի առաջ մոր՝ «ինձ այստեղ սպասիր, ես քո հետևից կգամ» խոսքերը Բահեի համար դարձել են կյանքի ուղենիշ: Այդ օրից ի վեր արդեն ծերունի Բահեն սպասում է մոր վերադարձին:
Թուրքական «Ռադիկալը» գրում է, որ մարդինցի ռեժիսոր Հայդար Դեմիրթաշը որոշել է կարճամետրաժ ֆիլմի վերածել Բահեի կյանքը: «Հյուրը» անունը ստացած 30 րոպեանոց ֆիլմը այս տարի կմասնակցի արդեն 50-րդ անգամ Անթալիայում անցկացվող Ոսկե նարինջ կինոփառատոնին: Ֆիլմի ռեժիսորը նշել է, որ փորձել է ներկայացնել Բահեի՝ մենաստանում անցկացրած երկար տարիները, որոնք լի են կարոտով և մոր սպասման հույսով: «Ֆիլմում պատմում ենք տարիներ շարունակ մենաստանում Բահեի կատարած աշխատանքի մասին, ներկայացվում են նաև ասորական մշակույթը, կրոնն ու պատմությունը: Նկարահանումների ժամանակ մենք փորձեցինք գտնել 76 տարի առաջ անհետ գնացած Բահեի քրոջը: Վերջինս ապրում է Սիրիայում ու նույնպես կարոտում է իր եղբորը»,-պատմել է ռեժիսոր Դեմիրթաշը:
http://ankakh.com
Leave a Reply