Ադրբեջանի իշխանությունները զինում են քուրդ գրոհայիններին

Ռուսաստանում թաքնվող Ադրբեջանի հատուկ ծառայությունների նախկին գործակալը պատմում է, որ իր երկրի կառավարությունը տարիներ շարունակ գաղտնաբար զենք և զինամթերք է մատակարարում Թուրքիայի կառավարության դեմ պայքարող քուրդ ապստամբներին՝ թարմացնելով երկու դաշնակից երկրների միջև լարվածություն առաջացնող ամենալուրջ թեման։ 

Ըստ Panorama.am-ի` այս մասին Caucasian Knot կայքի հետ հարցազրույցում հայտնել է Իբրահիմ Մուսայևը, ով Ադրբեջանի Ազգային անվտանգության նախարարության նախկին գործակալ է ու այժմ բնակվում է Ռուսաստանում։ Որոշները Մուսայևին կնքել են «ադրբեջանցի Սնոուդեն» մականունով՝ լրջություն եւ կարեւորություն հաղորդելով նրա բացահայտումներին, թեեւ որոշ լուրերի համաձայն` Ռուսաստանը պատրաստվում է արտահանձնել Մուսայեւին՝ հակառակ ամերիկացի նախկին գործակալ Էդվարդ Սնոուդենի վերաբերյալ որոշման։ 

Հայտնի հարցազրույցում Մուսայևը պնդում է, թե իր գործընկերը հայտնաբերել է փաստաթղթեր, որոնք փաստեր են ներկայացնում Ադրբեջանի զինված ուժերի կողմից Քուրդիստանի բանվորական կուսակցությանը զենք մատակարարելու վերաբերյալ։ 

Ըստ նոր ձեռք բերված փաստերի, շաբաթական երկու անգամ տարատեսակ զենքով և զինամթերքով բեռնված ինքնաթիռը իրականացնում է Բաքու–Նախիջեւան թռիչքը։ Մուսայևը պատմում է, որ Զեյնալով ազգանունով իր գործընկերը Նախիջեւանում այս ինքնաթիռների մատակարարումն իրականացնող վարորդներից է եղել, և նրա հետ մեքենայում մի անգամ բեռն ուղեկցել է մի գինովցած զինվոր, ում մոտ եղել են զենքի քանակը և ուղղությունը հավաստող փաստաթղթեր։ Այդ անգամ, պատահմամբ, զինվորը մոռանում է փաստաթղթերը մեքենայի մեջ, եւ Զեյնալովը հասցնում է դրանք պատճենել։ 

Պատճենված փաստաթղթերից պարզ է դարձել, որ ամբողջ զենքը Նախիջևանից ուղևորվելու է Թուրքիա՝ քուրդ զինյալներին։ 

Սակայն Մուսայևի ներկայացրած փաստերից դեռևս անհայտ է մնում, թե ովքեր են կանգնած զենքի այս փոխադրումների հետևում։ 

Նա պնդում է, որ անհնար է` Բաքվի կենտրոնական իշխանությունները այս մասին տեղեկացված չլինեն, թեեւ գործարքներն իրականացվում են Նախիջեւանի տեղական իշխանությունների կողմից, որտեղ իշխանության ղեկին ազգությամբ քուրդ պաշտոնյա է։

http://ermenihaber.am/?lang_id=2&news_=7&cur_news=814