Ներկայիս Թուրքիայի Դիարբեքիր նահանգի (պատմական Աղձնիք) Սուրի շրջանում գտնվող հայկական Սբ. Կիրակոս եկեղեցում նախօերին մատուցված պատարագին մասնակցել է Դիարբեքիրի` ազգությամբ քուրդ քաղաքապետ Օսման Բայդեմիրը: Ըստ թուրքական «Haberfx» կայքի` Բայդեմիրը հնչեցրել է այսպիսի խոսքեր.
«Այս քաղաքը որքան իմն է, նույնքան էլ` իմ հայ եղբայրներինը»:
Թուրքական մամուլն արդեն հասցրել է Դիարբեքիրի քաղաքապետի այս խոսքերը որակել որպես տարօրինակության դրսևորում:
Պատարագը մատուցվել է Պոլսի հայոց պատրիարքի փոխանորդ Արամ արքեպիսկոպոս Աթեշյանի ձեռամբ:
Նշենք, որ 1376 թվականին կառուցված Սբ. Կիրակոս եկեղեցին համարվում է Մերձավոր Արևելքի ամենամեծ եկեղեցիներից մեկը. ունի 1400 աղոթատեղի: Եկեղեցին վերանորոգվել է Ստամբուլում ապրող, բայց արմատներով դիարբեքիրցի հայերի ստեղծած «Սուրբ Կիրակոս հիմնադրամի» միջոցներով (70%) և Դիարբեքիրի քաղաքապետարանի ֆինանսական աջակցությամբ (30%): Ընդհանուր առմամբ կատարվել են 2.5 մլն դոլար արժողությամբ վերանորոգման ծախսեր:
Leave a Reply