Առաջին անգամ Վանի Աղթամարում եւ Դիարբեքիրի Սուրբ Կիրակոսում պատարագները կհաջորդեն միմյանց

Վանի Աղթամար կղզու Սուրբ Խաչ եկեղեցում եւ Դիարբեքիրի Սուրբ Կիրակոս եկեղեցում իրականացվելիք պատարագներն այս տարի հաջորդելու են միմյանց`սեպտեմբերի 8-ին եւ սեպտեմբերի 10-ին:

Վանի Աղթամար կղզու Սուրբ Խաչ եկեղեցում պատարագն իրականացվելու է այնպես, ինչպես որ նախատեսված է՝ սեպտեմբերի առաջին կիրակին: Հաշվի առնելով այն հանգամանքը, որ մեծ թվով ուխտավորներ Վան են այցելելու, որոշվել է Դիրաբեքիրի Սուրբ Կիրակոսում անցկացվող պատարագն իրականացնել Սուրբ Խաչի պատարագից 2 օր անց: Այս ձեւով հնարավորություն է տրվում Վանի Աղթամարի Սուրբ Խաչի պատարագին մասնակցած ուխտավորներին մեկնել Դիարբեքիր եւ այնտեղ էլ մասնակցել պատարագի:

Նախորդ մի քանի տարիներին Աղթամարի Սուրբ Խաչում պատարագն իրականացվել է սեպտեմբերի առաջին կիրակին, իսկ Դիարբեքիրի Սուրբ Կիրակոսում` հոկտեմբերին եւ նոյեմբերին:

Աղթամարի Սուրբ Խաչ եկեղեցին 915-921 թվականներին կառուցվել է Վասպուրականի իշխան Գագիկ Արծրունու պատվերով` ճարտարապետ, քանդակագործ և նկարիչ Մանվելի կողմից։ Տաճարի արտաքին պատերը զարդարված են 6 հորիզոնական շարք կազմող զարդաքանդակներով, որոնք չեն խախտում պատերի հարթությունը։ Զարդաքանդակները ստեղծելիս Մանվելը հաշվի է առել հնարավոր դիտանկյունները և տարբեր ժամերի լուսավորությունը։ 

1400 աղոթատեղի ունեցող Դիարբեքիրի Սուրբ Կիրակոս եկեղեցին կառուցվել է 1376 թվականին,  Հանչեփեք թաղամասում, որը տեղի մահմեդականները անվանել են «Գյավուրների թաղամաս» քանի որ այնտեղ մեծ թվով քրիստոնյաներ են ապրել մինչեւ Հայոց ցեղասպանությունը:

Սուրբ Կիրակոս եկեղեցին 1980-ից թողնվել է բախտի քմահաճույքին։ Այնուհետ, Ստամբուլում ապրող դիարբեքիրցի հայերը ստեղծել են «Սուրբ Կիրակոս հիմնադրամ»՝ եկեղեցին վերանորոգելու նպատակով։ 2,5 մլն դոլար արժողությամբ վերանորոգման ծախսերի 70 տոկոսը իր վրա է վերցրել հայկական հիմնադրամը, իսկ 30-ը՝ Դիարբեքիրի քաղաքապետարանը։

http://news.am/arm/news/169288.html