Թուրքիայում եւս մեկ հայկական եկեղեցի կվերանորոգվի եւ կդառնա թանգարան

Թուրքիայի Սիվաս (Սվազ) նահանգի Գյուրյուն քաղաքում գտնվող կիսավեր Սուրբ Աստվածածին եկեղեցին վերանորոգվելու է եւ թանգարան դառնալու ։ Այս մասին հայտնել է Գյուրյունի քաղաքապետ Մեհմեդ Աքթաշը։

Ինչպես տեղեկացնում է Hyetert-ը, Գյուրյունի քաղաքապետ Մեհմեդ Աքթաշը նշել է, թե իրենք մեծ տեղ են տալիս պատմական կառույցների վերանորոգմանն ու դրանք տուրիզմի նպատակով օգտագործելուն՝ շեշտելով, թե այդ շրջանակներում ոտքի են կանգնեցնելու Փընարօնյու թաղամասում գտնվող հայկական Սուրբ Աստվածածին եկեղեցին։

Թուրք քաղաքապետի խոսքով՝ հայկական եկեղեցու վերանորոգման նախագիծը հաստատվել է Սիվասի մշակութային ունեցվածքի պահպանության խորհրդի կողմից եւ առաջիկայում տենդեր կհայտարարվի՝ վերանորոգման աշխատանքների համար։

Նա նշել է, թե Գյուրյունի քաղաքապետարանի եւ Սիվասի նահանգապետարանի համատեղ աշխատանքների արդյունքում վերանորոգվելիք հայկական եկեղեցին վերածվելու է թանգարանի, որտեղ նաեւ մշակութային միջոցառումներ տեղի կունենան։

http://news.am/arm/news/146469.html