Պիտակավորվել են Հաթայի քրիստոնյաները

Հաթայը նախկին Ալեքսանդրետի սանջակն է: Երկրորդ համաշխարհայինի նախօրյակին` 1939-ին, Ֆրանսիայի թողտվությամբ Սիրիայից տարանջատվել եւ կցվել է Թուրքիայի սահմաններին: Վիլայեթի բնակչությունը խայտաբղետ է. այնտեղ զգալի թիվ են կազմում արաբները, կաթոլիկ եկեղեցու հետնորդ լատինները եւ այլ քրիստոնյաներ, որոնք ի սկզբանե դիտվել են որպես «կասկածելի եւ վնասակար» անձինք: Թերեւս այդ պատճառով էլ Հաթայի նահանգային կենտրոն Անտիոքում 2009 թ. սպանվել էր Վատիկանի ներկայացուցիչ Պադովեզ քահանան:

Ինչպես SAT-Turk հեռուստատեսության կայքէջը վկայում է մարտի 26-ին, պարզվել է, որ թուրքական զինված ուժերի գլխավոր շտաբի հատուկ նշանակության գործողությունների վարչությունը Տրապիզոնից եւ Մալաթիայից հետո պիտակավորել է նաեւ Հաթայի քրիստոնյաներին: Ինչպես հայտնի է, Տրապիզոնում սպանության զոհ էր դարձել կաթոլիկ քահանա Սանտորոն, իսկ Մալաթիայում` «Զիրվե» հրատարակչության 4 աշխատակիցներ:

Ըստ թուրքական հեռուստատեսության, Հաթայում քրիստոնյաների պիտակավորման փաստը բացահայտվել է շնորհիվ Ազգային հետախուզական կազմակերպության` MIT-ի` Թուրքիայի ազգային Մեծ ժողով ներկայացրած վավերագրերում առկա նամակի, որն իրազեկման բնույթ է կրում: Պիտակավորվողները բաժանվել են երկու խմբի` «Համագործակցության ենթականեր» եւ «Կասկածելի ու վնասակար անձինք»:

Ցուցակի երկրորդ բաժնում, բացի քրիստոնյաներից, ընդգրկվել են Հաթայի քրդերը, ալավիները, արաբները, քրիստոնյաները ներառյալ:

Հ. Չ.

http://azg.am/AM/2013032814