Ռագըփ Զարաքօլուի հետ հանդիպում` Արևմտահայոց հարցերի ուսումնասիրության կենտրոնում

Երեկ, «Արևմտահայոց հարցերի ուսումնասիրության կենտրոն» գիտահետազոտական հիմնադրամի նախաձեռնությամբ, կենտրոնում կազմակերպվեց հանդիպում Հայոց ցեղասպանությունը ճանաչած և Մեծ եղեռնի մասին բազմաթիվ գրքեր հրատարակած թուրք հայտնի մտավորական, «Բելգե» հրատարակչատան տնօրեն Ռագըփ Զարաքօլուի հետ:

Հանդիպմանը մասնակցում էին կենտրոնի աշխատակիցները, գիտնականներ, գրողներ, լրագրողներ, ասպիրանտներ և ուսանողներ: Հանդիպման սկզբում ողջույնի խոսքով հանդես եկավ Արևմտահայոց հարցերի ուսումնասիրության կենտրոնի տնօրեն Հայկազուն Ալվրցյանը` ելույթում նշելով. «Հարգարժան Զարաքօլուն իր գործունեությամբ մեծ ժողովրդականություն է վայելում ոչ միայն Թուրքիայում, այլ նաև համայն աշխարհում, որտեղ հետաքրքրություն կա մարդկային և ազգային իրավունքների և ընդհանրապես արդարության նկատմամբ: Հասկանալի պատճառներով պրն. Զարաքօլուի հանդեպ հետաքրքրությունն առավել մեծ է Հայաստանում, որտեղ պրն. Զարաքօլուն, որպես ազնիվ և անկաշառ մտավորական, պատմության ամենաբարդ հանգույցի` Հայոց ցեղասպանության մասին ունի ընդգծված տեսակետ, որը շատերը չեն կիսում: Նրա այս պայքարը, որը մղվում է հրատարակչական, հասարակական, քաղաքական, մամուլի ասպարեզներում, այսօր մեծ հետաքրքրության առարկա է ողջ աշխարհում»:

Ռ. Զարաքօլուն խոսքն սկսեց հայերեն «Բարև»-ով: Նա ելույթում շեշտեց. «Շատ երջանիկ եմ այստեղ գտնվելուս, մանավանդ երիտասարդների հետ հանդիպելուս կապակցությամբ, քանի որ դուք` երիտասարդներդ եք ներկայացնում ապագան: Եվ դուք մի կամուրջ եք` խարսխված անցյալի և ապագայի միջև: Միևնույն ժամանակ, քանի որ աշխատում եք թուրքագիտության և պատմագիտության բնագավառներում, կարծում եմ` դուք նաև կամուրջ կլինեք երկու ժողովուրդների միջև, որի համար շատ երջանիկ եմ: Ինչպես հայտնի է, Թուրքիան և Հայաստանը հարևան երկրներ են, սակայն շուրջ հարյուր տարի է, ինչ իրարից հեռու են նույնքան, որքան Լուսինն ու Երկիրը: Անիի մոտակայքում մի քանդված կամուրջ կա, որը 100 տարի է` անգործածելի վիճակում է: Ես հիմա հիշում եմ լուսահոգի ընկերոջս` Հրանտի` այնտեղ արված լուսանկարը, ով իր կյանքը կորցրեց նրա համար, որ ուզում էր վերականգնել այդ կամուրջը: Դա նշանակում է, որ Թուրքիայում կան մարդիկ, ովքեր վախենում են այս կամրջի վերակառուցումից»:

Զարաքօլուն ընդգծելով նաև, որ Թուրքիայի Հանրապետությունում տարվում է հայկական մշակույթը ոչնչացնելու և չնկատելու քաղաքականություն, նշեց. «Ես կարծում եմ, որ հենց սա է յուրաքանչյուր ցեղասպանության վերջակետը»:

Հանդիպման վերջում Զարաքօլուն պատասխանեց մասնակիցների հարցերին:

Նշում. Արևմտահայոց հարցերի ուսումնասիրության կենտրոնի նախաձեռնությամբ կազմակերպված այս հանդիպմանն անդրադարձած որոշ հայկական լրատվամիջոցներում այն սխալմամբ ներկայացվել է որպես «լրագրողների հետ հանդիպում»: Արևմտահայոց հարցերի ուսումնասիրության կենտրոնը պաշտոնապես հայտնում է, որ կենտրոնի կողմից նախաձեռնված սույն հանդիպումը ոչ թե մամլո ասուլիս էր, այլ` մտերմիկ հանդիպում, որին մասնակցել են նաև գիտնականներ, գրողներ և երիտասարդ սերնդի ներկայացուցիչներ:

Akunq.net