PKK-ի 100 հոգանոց խումբը լքել է Թուրքիայի տարածքը

Թուրքիայի տարածքն արդեն լքել է Քրդստանի աշխատավորական կուսակցության (PKK) մի խումբ, փոխանցում է թուրքական «Աքշամ» պարբերականը:

Քրդական կազմակերպության 100 հոգանոց խումբը նախօրեին Թուրքիայից անցել է Հյուսիսային Իրաքի քրդական ինքնավարության տարածք:

Հատելով սահմանը` PKK-ականները մտել են Զապ և Հաքուրթ շրջաններ, որտեղ էլ գտնվում են կազմակերպության հենակայանները:

Քրդերի տեղաշարժն օդից հետևել են թուրքական F-16 կործանիչներն ու անօդաչու թռչող սարքերը: PKK-ականների տեղաշարժն անցել է առանց պատահարների:

Հիշեցնենք, որ մարտի 21-ին Դիարբեքիրի հրապարակում, որտեղ հարյուր հազարավոր քրդեր էին հավաքվել` տոնելու Նովրուզը, քրդական խորհրդարանական Խաղաղություն և ժողովրդավարություն կուսակցության պատգամավորներ քրդերենով և թուրքերենով ներկայացրել են թուրքական բանտում ցմահ ազատազրկում կրող քուրդ առաջնորդ Աբդուլլահ Օջալանի ուղերձը:

Ուղերձում քուրդ առաջնորդը կոչ էր արել PKK-ին վայր դնել զենքն ու լքել Թուրքիայի տարածքը: Օջալանը նաև նշել է, որ ժամանակն է եղել պայքարը տեղափոխել քաղաքական դաշտ և ժողովրդավարական ձևով լուծել խնդիրները:

allTurkey.am