Ռուս քաղաքագետ. Նեթանյահուին հեռախոսազանգից հետո խոսք չի կարող լինել Կնեսետի կողմից Հայոց ցեղասպանության ճանաչման մասին

Թուրքիայի եւ Իսրայելի միջեւ հարաբերությունների նորմալացումը փաստացի որեւէ կերպ չի անդրադառնա տարածաշրջանի վրա, քանի որ երկու երկրների միջեւ վերականգնվում են այն հարաբերությունները, որոնք եղել են մինչեւ 2010 թվականը: Այս մասին NEWS.am-ի թղթակցի հետ զրույցում նշեց Քաղաքական եւ ռազմական վերլուծությունների ռուսական ինստիտուտի վերլուծական բաժնի ղեկավար Ալեքսանդր Խրամչիխինը:

Նրա խոսքով՝ այդ երկու երկրների միջեւ վեճը կարելի էր անբնական ինչ-որ բան համարել: «Ես Թուրքիայի եւ Իսրայելի հարաբերություններում որեւէ սկզբունքային փոփոխության հնարավորություն չեմ տեսնում: Պարզապես այդ երկրների միջեւ առկա վեճը տհաճ էր ԱՄՆ-ի համար, ուստի Բարաք Օբաման որոշեց խառնվել եւ, ինչպես երեւում է, Նեթանյահուին խնդրել է զանհագարել Թուրքիայի վարչապետ Էրդողանին»,-ասաց քաղաքագետը:

Հարցին, թե թուրք-իսրայելական հարաբերությունների վերականգնումը կազդի՞ Իսրայելի Կնեսետի կողմից Հայոց ցեղասպանության հնարավոր ճանաչման վրա, Խրամչիխինը պատասխանեց. «Բնականաբար, այդ հեռախոսազանգից անմիջապես հետո Կնեսետի կողմից Հայոց ցեղասպանության ճանաչման մասին խոսք չի կարող լինել»:

Հիշեցնենք, որ մարտի 23-ին հայտնի է դարձել, որ հեռախոսազրույց է տեղի ունեցել Իսրայելի վարչապետ Բենյամին Նեթանյահուի եւ Թուրքիայի վարչապետ Ռեջեփ Թայիփ Էրդողանի միջեւ: Նեթանյահուն ներողություն է խնդրել «Ազատության նավատորմի» պաղեստինամետ 9 թուրք ակտիվիստների մահվան առթիվ: Կողմերը համաձայնել են նորմալացնել իրենց հարաբերությունները:

http://news.am/arm/news/146030.html