«Այստեղով թուրքեր են անցել, բայց այլևս չեն անցնի»

«Մոսկվա» կինոթատրոնում տեղի ունեցավ Բերձորի (Լաչին) ազատագրման մասին պատմող «Միացում» ֆիլմի երևանյան պրեմիերան, մինչ այս՝ ֆիլմը ցուցադրվել է Ստեփանակերտում և Բերձորում:

Նկարահանման աշխատանքները տևել են 7 ամիս, օգտագործվել մարտական 7 օպերատորի նկարահանած կադրեր: 50 րոպե տևողությամբ ֆիլմում նախ ներկայացվում է Արցախի պատմությունը, որ այն եղել է հայկական հնագույն տարածք, այնուհետ անցում է կատարվում ազատագրական պայքարին և դրա հաղթական ելքին: «Միացում» ֆիլմի բեմադրող ռեժիսոր և սցենարի հեղինակ Սամվել Թադևոսյանը տեղեկացրեց, որ առաջին անգամ ցուցադրվելու են բացառիկ կադրեր նաև Խոջալուի օպերացիայից, նաև` թուրքական աղբյուրների վկայությունները Լաչինի ազատագրման գործողությունների մասին:

«Առաջին անգամ օգտագործվել է Ադրբեջանի ազգային հերոս, ռազմական լրագրող Չինգիզ Մուսթաֆաևի` 16-րոպեանոց տեսանյութը, որում նշվում են ադրբեջանցի գնդապետների անուններ, ովքեր հրաման են տվել լքել Լաչինը: Ազատագրման պահին Լաչինը դատարկ է եղել: Ֆիլմը փաստերով հակադարձում է ադրբեջանական սուտ տեղեկատվությանը, թե հայերը Լաչինում կոտորած են արել: Ես ինքս Դուշման Վարդանի վաշտի կազմում անձամբ տեսել ու նկարահանել եմ նոր ազատագրված Լաչինը. այդ պահին Լաչինում ամեն ինչ կար, բացի թուրքերից: Չենք անտեսել նաև Խոջալուն, ցույց ենք տալիս, թե ինչպես են հայերը ադրբեջանցի գերի ընկած երեխաների համար կաթ տաքացնում, գերիների վկայությունները կան, որ իրենց ոչ մեկը չի բռնացել, փորձել սպանել: «Շուշիի լեգենդից» հետո այս ամենի մասին պետք է խոսվի, այն էլ չավարտված պատերազմի և տեղեկատվական ստահոդ հարձակումների պայմաններում»,- շեշտեց ռեժիսորը:

Իր հերթին նախագծի հեղինակ Տիգրան Մանասյանը հավելեց. «Ֆիլմի միջոցով ցույց են տալիս, որ հայերի ձեռքերը արյան մեջ թաթախված չեն. մենք պաշտպանվել ենք և այսօր էլ խաղաղության կողմնակից ենք: Սա օտարներին ցույց տալու համար է, բայց նախ հայ հանդիսատեսի համար, քանի որ յուրաքանչյուրս պարտավոր ենք իմանալ մեր պատմությունը»:

Ֆիլմի խաղարկային ավարտը ոգեկոչման կոչ է և «մեսիջ»` ուղղված մեր հակառակորդին և միջազգային հանրությանը. «Այստեղով թուրքեր են անցել, բայց այլևս չեն անցնի»:

Նախագծի հեղինակ Տիգրան Մանասյանը ռեժիսորի ֆիլմային խոսքն այս կերպ մեկնաբանեց. «Արցախը ոչ մի երկրի հետ ընդհանուր բան չի կարող ունենալ»:

http://haynews.am/hy/1364207784