Դինքի գործով գաղտնի վկային տեղափոխել են Ստամբուլի խիստ վերահսկողության բանտ

Ստամբուլի հայկական «Ակօս» պարբերականի նախկին գլխավոր խմբագիր Հրանտ Դինքի սպանության գործով հայտնված նոր վկան հատուկ նամակ է գրել Ստամբուլի մանկական հանցագործությունները քննող 2-րդ դատարան: Նամակում վկան խոստացել է իր և իր ընտանիքի անվտանգությունն ապահովելու դեպքում նոր մանրամասներ հայտնել Դինքի գործի հետ կապված:

Ինչպես հաղորդում է «Արմենպրես»-ը, այս մասին տեղեկացնում է թուրքական Radikal պարբերականը:

Դատախազ Մուամմեր Աքքաշի կարգադրությամբ վկայի ընտանիքին հսկելու համար հատուկ ոստիկանական խումբ է նշանակվել: Միաժամանակ հայտնի է դարձել, որ Թոքաթում գտվող վկային տեղափոխել են Ստամբուլի խիստ վերահսկողության բանտ:

Ավելի վաղ Դինքի գործով գաղտնի վկան հայտարարել էր, որ սպանությունն իրագործած Օգյուն Սամասթը կապ է ունեցել Տրապիզոնի նահանգի եւ Ստամբուլի ժանդարմերիաների հրամանատարությունների հետ, որոնցից նա նաեւ օգնություն է ստացել: Վկան ասել էր, որ Դինքի սպանությանը մասնակից է եղել նաեւ Գիրեսունի ժանդարմերիայի աշխատակից Դուրսուն Ալի Քարադումանը, ով սպանությունն իրագործելուց հետո պետք է կազմակերպեր Սամասթի փախուստը Ադրբեջան` Արդվինի ճանապարհով: Նա նաեւ նշել է, որ ժանդարմերիայի հետախուզական բաժանմունքները 2003 թ-ից մինչեւ 2007 թ. նրա սպանությունը հետեւել են Հրանտ Դինքին:

Ստամբուլի ծանր հանցագործությունների 13-րդ դատարանը 2012 թ. հունվարի 17-ին ընդունած վճռով 20,5 տարվա ազատազրկման է դատապարտել Օգյուն Սամասթին, իսկ նրան սպանության դրդած Յասին Հայալին` ցմահ ազատազրկման:

Հրանտ Դինքի ընտանիքի փաստաբանները բողոքարկել են վճիռը` հիմնավորելով, որ սպանությունը կազմակերպված է, եւ պահանջել են բացահայտել կազմակերպիչներին:

http://armenpress.am/arm/news/712543/dinqi-gortsov-gaxtni-vkayin-texapokhel-en-stambuli-khist.html