Դինքի գործով գաղտնի վկան խոսել է Թուրքիայի ժանդարմերիայի և սպանության կապի մասին

«Ակօս»-ի խմբագրապետ Հրանտ Դինքի սպանության գործով ի հայտ եկած գաղտնի վկան՝ «Բարըշ» ծածկանվամբ, վկայություն է տվել։

Ինչպես տեղեկացնում է «Ակօս»-ը, վկան հայտարարել է, որ մարդասպան Օգյուն Սամասթը կապ է ունեցել Տրապիզոնի նահանգի և Ստամբուլի ժանդարմերիայի հրամանատարությունների հետ և օգնություն է ստացել նրանցից։

Վկան պատմել է, որ Դինքի սպանությանը մասնակցություն է ունեցել նաև Գիրեսունի Ժանդարմերիայի պաշտոնյա Դուրսուն Ալի Քարադումանը, և նախատեսվում էր սպանությունից հետո Սամասթին Արդվինի ճանապարհով Ադրբեջան փախցնել։

2003թ-ից մինչև սպանությունը՝ 2007թ., ժանդարմերիայի հետախուզական ստորաբաժանումները հետևել են Դինքին։

Անդրադառնալով Սամասթի՝ Ստամբուլ գալու օրվան՝ Բարըշը պատմել է. «Սամասթը Ստամբուլ է եկել Տրապիզոնի ժանդարմերիայի ենթասպայի ուղեկցությամբ։ Վերջինս էլ Սամասթի համար կեցության վայր է գտել, «Ակօս»-ի շրջակայքը հետազոտել, իսկ սպանության պահը դիտել է անձամբ»։

Նա նշել է, որ Սամասթին Ստամբուլում դիմավորել է նաև Ստամբուլի ժանդարմերիայի ներկայացուցիչներից մեկը, իսկ սպանությունից հետո Արդվինի տոմս են առել, որպեսզի սպանությունից հետո փախցնեն Ադրբեջան։

Վկան պնդել է, որ Սամասթի մոտ, բացի բջջայինի օգտագործվող sim քարտից, նաև այլ երկու քարտեր են եղել, որոնք ավելի ուշ անհետացել են։ Փոխվել է նաև սպանության զենքը. այն զենքը, որով կատարվել է սպանությունը, և մյուս զենքը, որը հայտնաբերվել էր Սամասթի մոտ, նույնը չէ։

Բարըշը պնդել է, որ «Էրգենեկոն»-ի գործով ձերբակալված գեներալ Վելի Քյուչուքից ու Տրապիզոնի ժանդարմերիայի նախկին ղեկավար Ալի Օզից բացի` սպանության հետ կապ է ունեցել նաև Գիրեսունի Ժանդարմերիայի հրամանատար Դուրսուն Ալի Քարադումանը։
«Վելի Քյուչուքը հաճախ գալիս էր Ալի Օզին տեսակցելու։ Նրանք առանձին էին հանդիպում։ Օզը սպանությունից հետո հարցաքննվող ժանդարմերիայի անձնակազմին պատվիրել էր «բերանները փակ պահել»՝ խոստանալով, որ դատավարությունը շուտով մոռացվելու է։

http://tert.am/am/news/2013/03/21/barish-dink/