Բաքուն քննադատում է Թուրքիային՝ Երեւան-Վան չվերթների համար

Արտոնելով ուղիղ թռիչքներ Վանից Երեւան՝ Թուրքիան խորացնում է Լեռնային Ղարաբաղի  օկուպացիան»,-գրել է ադրբեջանցի լրագրող Մահիր Զեյնալովը թուրքական «Զաման»-ում:

Վերլուծաբանը պնդում է, թե «մինչեւ օրս Թուրքիան կարողացել է հաջողությամբ առաջ տանել Հայաստանի մեկուսացման եւ զսպման իր քաղաքականությունը, սակայն այժմ Հայաստանի եւ Թուրքիայի միջեւ սկսվող նոր ուղիղ չվերթը ակնհայտորեն խախտում է այս մարտավարությունը»:

Ավելի վաղ, հիշեցնենք, թեմային անդրադարձել էր նաեւ պաշտոնական Բաքուն՝ հրապարակավ քննադատելով հաջորդ ամսվանից մեկնարկող նախաձեռնությունը:

«Դրանով Անկարան աջակցում ու ուժեղացնում է մի երկրի, որը շարունակում է օկուպացնել ադրբեջանական տարածքները»,-հայտարարել էր Ադրբեջանի նախագահի աշխատակազմի ներկայացուցիչ Ալի Հասանովը եւ բացահայտորեն խոստովանել, որ Բաքուն ոչ միայն մտահոգված է, այլեւ խանդով է վերաբերվում հայ-թուրքական հարաբերություններին. – «Երբ Հայաստանի հետ հարաբերությունները խորացնում է այնպիսի երկիր, որի հետ մենք բարեկամական կապեր ունենք, եւ որի ռազմավարական շահերը համընկնում են Ադրբեջանի շահերին, ապա մենք կրկնակի խանդով ենք վերաբերվում դրան»:

«Զաման»-ում հրապարակած հոդվածում ադրբեջանցի վերլուծաբանը եւս փաստում է, որ հայ-թուրքական հարաբերությունների դաշտում ցանկացած քայլ բուռն արձագանքի է արժանանում Ադրբեջանում:

«Պատմությունը ցույց է տվել, որ ամեն անգամ, երբ հայ-թուրքական հարաբերությունների հաշտեցման հեռանկար է բացվում, Երեւանը սառեցնում է բանակցությունները Ադրբեջանի հետ: Եվ ամենեւին   զարմանալի չէ, որ ադրբեջանցիները զայրացած են երկու հարեւանների միջեւ ակտիվացող կապերից, որոնք Հայաստանին դարձնում են ավելի կոշտ եւ անդրդվելի Ադրբեջան հետ բանակցություններում», – գրել է ադրբեջանցի վերլուծաբանը:

Թեմային այսօր անդրադարձել է նաեւ թուրքական «Ջիհան» գործակալությունը՝ ընդգծելով, որ Հայաստանի եւ Թուրքիայի միջեւ ուղիղ չվերթներ կան վաղուց: Նոր նախաձեռնությունը, սակայն, լուրջ դժգոհություն է առաջ բերել Ադրբեջանում մի քանի պատճառով. – «Նախ, Բաքվում կարծում են, որ պաշտոնական Անկարան ինչ-որ ծրագիր ունի 1915 թվականի ողբերգության հարյուրամյա տարելիցին՝ 2015-ին ընդառաջ, սակայն, որեւէ բան այդ մասին չի բարձրաձայնում: Արդյունքում Ադրբեջանում մտավախություններ են առաջ գալիս, թե գուցե հիմքեր են ստեղծվում հայ-թուրքական հաշտեցման գործընթացի վերականգման համար»:

Որպես ասվածի ապացույց` հոդվածագիրը փաստում է, որ Թուրքիայի նախագահը հայաստանցի իր գործընկերոջը՝ Սերժ Սարգսյանին, նախագահական ընտրություններում հաղթանակի կապակցությամբ շնորհավորական ուղերձ հղեց վերջնական արդյունքների հրապարակումից օրեր առաջ, ինչը է’լ ավելի խորացրեց ադրբեջանցիների զայրույթը:

«Նախ՝ շատերի համոզմամբ, հենց Գյուլն է հայ-թուրքական հաշտեցման գործընթացի իրական նախաձեռնողը: Բացի այդ, Ադրբեջանում շատերն են հիշում, որ 2008-ին «ֆուտբոլային դիվանագիտության» մեկնարկը տրվեց հենց այսպես, սակայն` այլ ռազմավարությամբ», – գրում է թուրքական գործակալությունն ու հիշեցնում. – «Անգամ այն բանից հետո, երբ ցյուրիխյան արձանագրությունները ձախողվեցին, Գյուլը հայտարարեց, թե Թուրքիան կշարունակի Հայաստանի հետ «լուռ դիվանագիտությունը», ասել է թե` կապերը կզարգանան փակ դռների ետեւում»:

Նշենք, որ ադրբեջանական կողմի դժգոհություններին ի պատասխան Թուրքիայի արտգործնախարարությունը եւ Բաքվում Թուրքիայի դեսպանը մի քանի անգամ արդեն հայտարարել են, թե Երեւան-Վան չվերթը իրականացվում է ոչ թե Թուրքիայի կառավարության, այլ մասնավոր ընկերության կողմից: Անկարայի պաշտոնական այս պարզաբանումը, սակայն, Ադրբեջանի իշխանություններին կարծես չի գոհացրել, կասկածները չի փարատել:

«Դեռ պետք է պարզել, թե որքանով են ձեռնտու եւ եկամտաբեր այդ չվերթները մասնավոր ընկերության համար», – նախօրեին Բաքվում հայտարարել է Ադրբեջանի արտգործնախարար էլմար Մամեդյարովը:

http://www.azatutyun.am/content/article/24935199.html