Օջալանը հանդես կգա «պատմական ուղերձով»

Թուրքիայում ցմահ բանտարկված Քրդստանի աշխատավորական կուսակցության (PKK) առաջնորդ Աբդուլահ Օջալանը մտադիր է այսօր «պատմական ուղերձով» դիմել իր կողմնակիցներին, հաղորդում է РИА Новости-ն:

Քրդստանի աշխատավորական կուսակցությունը, որը հիմնվել է Օջալանի կողմից 1987թ. զինված պայքար է մղում՝ Թուրքիայի հարավ արևմուտքում անկախ Քրդստանի հիմնման նպատակով: Այս հակամարտությունն ավելի քան 40 000 մարդու կյանք է խլել: ՄԱԿ-ի կողմից ահաբեկչական խմբավորում ճանաչված ՔԱԿ-ի հիմնական ճամբարները տեղակայված են Հյուսիսային Իրաքում, որտեղ տարբեր տվյալներով` մոտ 3000 զինյալներ են գործում:

Ակնկալվում է, որ Օջալանի ուղերձը կվերաբերի ՔԱԿ-ի և Թուրքիայի միջև հակամարտության լուծման վերաբերյալ ռազմական և քաղաքական նախաձեռնություններին: Մասնավորապես, նա մտադիր է իր կողմնակիցներին կոչ անել դադարեցնել թուրքական իշխանություններին ցուցաբերվող դիմադրությունը, դուրս բերել ռազմական ուժերը երկրի տարածքից և սկսել խաղաղ բանակցությունները: Միևնույն ժամանակ, Թուրքիայի քաղաքական կուսակցություններին կհորդորի աջակցել հակամարտության խաղաղ կարգավորման նախաձեռնությանը:
ՔԱԿ-ի առաջնորդի՝ «պատմական ուղերձ» հնչեցնելու մտադրության մասին հայտնել են Թուրքիայում օրինական գործող պրոքրդական Խաղաղություն և ժողովրդավարություն կուսակցության ներկայացուցիչները՝ օրերս Օջալանի հետ հանդիպելուց հետո:

Թուրքիայի իշխանությունները անցյալ տարվա հոկտեմբերից բանակցություններ են վարում Օջալանի հետ՝ քրդական հարցի լուծման նպատակով: 1999թ. ի վեր բանտում գտնվող Օջալանին է այցելել Թուրքիայի կառավարությունը և հատուկ ծառայությունները ներկայացնող 3 պատվիրակություն:

http://tert.am/am/news/2013/03/21/ojalan/