Թուրքիայի խորհրդարանի քրդական Խաղաղություն և ժողովրդավարություն կուսակցության նախագահ Սելահեթթին Դեմիրթաշը պատմել է Քրդստանի աշխատավորական կուսակցության (PKK) առաջնորդ Աբդուլլահ Օջալանի հետ հանդիպման մասին:
Դեմիրթաշը հանդիպման ժամանակ Օջալանի խոսքերից մեջբերումներ է կատարել «Ազատ օրակարգ» թերթի հետ զրույցի ժամանակ:
Դեմիրթաշն անդրադարձել է նաև Օջալանի այն մտքերին, որոնցում նշվել են հայերի մասին:
«Նա առաջարկել է, որպեսզի իր առաջարկած մտավորականների հանձնաժողովի կազմում ընդգրկվեն Թուրքիայի բոլոր ազգային փոքրամասնությունների ներկայացուցիչները:
«Սա միայն թուրք-քրդական խաղաղություն չէ: Եթե այս տարածքներում իրոք խաղաղություն պետք է լինի, ապա մտավորականների հանձնաժողովում պետք է լինեն և հայեր, և հրեաներ, հույներ ու չերքեզներ»,-Օջալանի խոսքերն է մեջբերել Դեմիրթաշը:
Նշենք, որ վերջին շրջանում թվով երրորդ պատվիրակությունը, որը մեկնել էր Իմրալը կղզի` Օջալանի հետ հանդիպման, կազմում էին Խաղաղություն և ժողովրդավարություն կուսակցության ներկայացուցիչները:
Աբդուլլահ Օջալանը (ծնվ.՝ 1949 թ.-ին, Ուրֆայում), ով քրդերի շրջանում հայտնի է նաև Ափո անունով, Քրդստանի աշխատավորական կուսակցության (PKK) հիմնադիրն է և առաջնորդը: Մարքսիստական գաղափարների կողմնակից է:
Քրդստանի անկախության, ավելի ուշ քուրդ ժողովրդի իրավունքների ընդլայնման համար Թուրքիայի դեմ 30-ամյա պայքար մղող Օջալանը 1999 թ. փետրվարի 15-ին ձերբակալվել է և թուրքական դատարանի կողմից դատապարտվել մահապատժի՝ «հայրենիքի դավաճանության» մեղադրանքով, որն ավելի ուշ փոխարինվել է ցմահ ազատազրկմամբ: Վերջինս իր պատիժը կրում է թուրքական Իմրալը կղզում գտնվող բանտում:
Leave a Reply