Թուրք-քրդական հաշտության հաջողության համար անհրաժեշտ է, որպեսզի Թուրքիայի կառավարությունը քուրդ ժողովրդին կարգավիճակ տա: Այս մասին հայտարարել է քրդական Դեմոկրատական հասարակություն կուսակցության առաջնորդ, թուրքական խորհրդարանում անկախ պատգամավոր Ահմեթ Թուրքը Թուրքիայի` մեծամասամբ քրդերով բնակեցված Ուրֆա նահանգի Վիրանշեհիր քաղաքում 10 հազարից ավելի մարդկանց մասնակցությամբ անցկացված Նովրուզի տոնակատարության հանդիսության ժամանակ ունեցած ելույթում:
«2013 թ-ը կլինի քուրդ ժողովրդի եւ Աբդուլլա Օջալանի ազատության տարին», -հայտարարել է նա: Այս մասին, ինչպես հաղորդում է «Արմենպրես»–ը, հայտնում է թուրքական «Հուրիեթ» թերթը:
Թուրքն ասել է, որ անհրաժեշտ է ուշադրություն հատկացնել Թուրքիայում քրդական խնդրի լուծմանն ուղղված` Իմրալը բանտում ցմահ բանտարկության մեջ գտնվող Քուրդիստանի աշխատավորական կուսակցության (PKK) առաջնորդ Աբդուլլահ Օջալանի եւ թուրքական կառավարության միջեւ «համաձայնեցված ծրագիրը»: «Գործընթացում պետք է ազնիվ լինել եւ լավ գնահատել այս առիթը: Քուրդ ժողովուրդը տարիներ շարունակ մոլորության մեջ է գցվել: Այս ժողովուրդն ազատության համար մեծ գին է վճարել եւ խաղաղություն ապահովելու համար այսօր հնարավորություն է ընձեռել վարչապետ Էրդողանին: Եթե քուրդ ժողովրդին կարգավիճակ չշնորհվի, խաղաղությունը կվտանգվի: 2013 թ-ը քուրդ ժողովրդի եւ Աբդուլլահ Օջալանի ազատության տարին է», -ասել է նա:
Թերթը հայտնում է, որ Օջալանի հետ հանդիպելու համար այսօր Իմրալը բանտ է մեկնել քուրդ քաղաքական գործիչների երրորդ պատվիրակությունը, որի կազմում այս անգամ ընդգրկվել է նաեւ Թուրքիայի խորհրդարանում միակ քրդական Խաղաղություն եւ ժողովրդավարություն կուսակցության (BDP) առաջնորդ Սալահեդդին Դեմիրթաշը: Պատվիրակությունը Օջալանին կհանձնի այն նամակի պատասխանը, որում վերջինս նախորդ պատվիրակության հետ թուրքական կառավարությանը եւ PKK-ի զինված թեւի ղեկավարությանը շարադրել էր քրդական խնդրի լուծման իր տեսլականը:
Թուրքիայում թե քրդական, թե թուրքական կողմերը ոգեւորությամբ են խոսում քրդական խնդրի լուծման եւ երկու ժողովուրդների միջեւ խաղաղության հաստատման գործընթաց սկսելու մասին: Թեեւ քրդական կողմը հայտարարում է PKK-ի կողմից զենքը վայր դնելու դիմաց Թուրքիայի սահմաններում քրդական ինքնավարություն ստեղծվելու եւ Օջալանին բանտից ազատ արձակվելու պայմանների մասին, սակայն թուրքական պաշտոնական շրջանակները հերքում են դա եւ նշում կարճ ժամկետերում PKK-ի` Թուրքիայի սահմանները լքելու եւ դրա առաջնորդներին արտասահմանում ապաստան տալու մասին:
Leave a Reply