Ամերիկացի լուսանկարչուհի Սարա Սիերայի սպանության մեջ մեղադրվող Զիյա Թ-ն խոսել է իր արարքի մասին:
Նախօրեին հայտնի էր դարձել, որ թուրքական ոստիկանությունը կալանավորել էր «Լազ Զիյա» անունով տղամարդուն, ով մեղադրվում է Ստամբուլ ժամանած ԱՄՆ քաղաքացու սպանության մեջ:
«Ես տեսա մի կնոջ, ով, լուսանկարներ անելով, ուղիղ դեպի իմ կողմ էր գալիս: Երբ հասավ ինձ, փորձեցի համբուրել նրան: Սկսեց ինձ հարվածել: Սկսեցինք իրար քաշքշել: Այդ պահին բջջային հեռախոսով հարվածեց դեմքիս, քթիցս սկսեց արյուն գալ: Շատ բարկացա և ամբողջ ուժով հարվածեցի նրան»,-նշել է մարդասպանը:
«Վայր ընկանք, կրկին փորձեցի համբուրել, նա նորից ինձ հարվածեց: Այդ պահին մի քար վերցրեցի և մի քանի անգամ հարվածեցի գլխին: Նա կորցրեց գիտակցությունը: Թողեցի նրան այնտեղ և հեռացա: Երևի այս ամենը մոտ կես ժամ տևեց»,-հավելել է «Լազ Զիյան»:
Վերջինս նաև նշել է, որ ինքն է իր կամքով հանձնվել ոստիկանությանը:
Հիշեցնենք, որ հունվարի սկզբին միայնակ Ստամբուլ էր ժամանել ԱՄՆ քաղաքացի, լուսանկարիչ Սարա Սիերան, ով մի քանի օր անց անհետ կորել էր: Օրեր անց նրա անշունչ մարմինը հայտնաբերել էին Ստամբուլի թաղամասերից մեկում:
Ամերիկացի լուսանկարչի սպանությունը մեծ աղմուկ էր բարձրացրել ինչպես Թուրքիայում, այնպես էլ նրա սահմաններից դուրս:
Մահացածի մարմինը հայտնաբերելուց հետո մամուլում տեղեկություններ տարածվեցին, թե Սիերան կարող էր Թուրքիա մեկնել թմրանյութերի վաճառքի համար: Միայնակ Ստամբուլ ժամանած ամերիկուհին նախատեսում էր այցելել նաև Ամստերդամ: Սիերան ամուսնացած էր և երկու երեխա ուներ:
Leave a Reply