Հայերից պետք է ներողություն խնդրենք. թուրք դիվանագետի համարձակ հայտարությունը

Թուրք նախկին դիվանագետ, Թուրքիայի արդյունաբերողների եւ գործարարների միության (TÜSİAD) տնօրենների խորհրդի մշտական անդամ Վոլքան Վուրալը կրկին պնդել է, որ չընդունելով Ցեղասպանությունը, Թուրքիան պետք է հայերից ներողություն խնդրի տեղի ունեցած ողբերգության համար։

Վոլքան Վուրալը թուրքական Haber7-ի թղթակցի հետ հարցազրույցում կրկնել է տարիներ առաջ արած հայտարարությունը, որը խիստ արձագանք էր գտել Թուրքիայում, ինչպս նաեւ նոր սկանդալային հայտարարություն արել։

Հայաստանի հետ մեր խնդիրները դեռ շարունակվում են։ Մի հարցազրույցի ժամանակ դուք ասել եք, որ պետք է հարաբերություններ ստեղծել Հայաստանի հետ, Ցեղասպանությունը չընդունելով` պետք է ներողություն խնդրենք հայերից։ Դեռ նույն տեսակետի՞ն եք։

Այո, նույն տեսակետին եմ։ Այս հողերում միլիոնից ավել հայ է ապրել։ Նրանք այս հողերի զավակներն են։ Մի շարք իրադարձություններ են եղել։ Ոմանք դրան ցեղասպանություն են ասում, ոմանք՝ մեծ ողբերգություն։ Եթե ինձ մնա, դա տեղահանում էր ու ողբերգություն։ Իհարկե, այն ժամանակվա օսմանյան պետության մեղքը կա։ Այդ մեղքի պատճառով հնարավոր է ներողություն խնդրել։ Իհարկե, հայերն էլ մեղք ունեն։

Պատմաբանները չեն կարողանում լուծել, քաղաքական գործիչներն ինչպե՞ս են լուծելու։

Իմ կարծիքով սա քաղաքական խնդիր է, եւ քաղաքական գործիչները կլուծեն։ Այստեղ կարելի է ներողություն խնդրել, մահացած եւ տեղահանության ենթարկված մարդկանց թոռներին էլ կարելի է կոչով դիմել. «Սրանք նաեւ ձեր հողերն են, եկե’ք, ձեզ էլ տեղ կա»։ Եկողներին կարելի է քաղաքացիություն տալ։

Լավ, եթե միլիոնավոր մարդ գա, ի՞նչ ենք անելու։

Այդքան շատ չեն։ Ամենաշատը կարող է 500 հազար լինի։ Թող երեխաների եւ թոռների հետ 600 հազար լինեն։

TÜSİAD-ը Հայոց ցեղասպանության 100-րդ տարելիցի հետ կապված 2015-ի պատրաստություններ տեսնո՞ւմ է:

Մենք հետեւում ենք, թե աշխարհում ինչպիսի գործընթացներ են տեղի ունենում։ Թուրքիայում էլ բավականին քննարկումներ են արվել այդ թեմայով՝ հասկանալ տեղահանության իրականությունը։  Մենք, որպես միություն, մտածում ենք բաց եւ փակ համաժողովներ կազմակերպել։ Նախատեսում ենք բերել այդ թեման ուսումնասիրած մարդկանց։

2015-ին բացելո՞ւ ենք սահմանները։

Իմ կարծիքով պետք է բացենք։ Տա Աստված, լինի։ Կարսի տարածաշրջանի համար էլ դա շատ կարեւոր է։ Ուղիղ առեւտուր չանելու պատճառով դրանից օգտվում են 3-րդ երկրները։ 

http://news.am/arm/news/144806.html