Ադրբեջանը խանդով է վերաբերվում Երևան-Վան չվերթի գործարկմանը

Երևան-Վան չվերթի գործարկման մասին տեղեկությունը խիստ մտահոգել է ադրբեջանական կողմին:

Ինչպես տեղեկանում ենք ադրբեջանական լրատվամիջոցներից, Ադրբեջանի նախագահի աշխատակազմի հասարակական-քաղաքական հարցերի բաժնի պետ Ալի Հասանովը, անդրադառնալով Հայաստանի և Թուրքիայի միջև ուղիղ չվերթի վերագործարկմանը, հայտարարել է, թե Անկարան այդ կերպ աջակցում ու ուժեղացնում է մի երկրի, որը «շարունակում է օկուպացված պահել ադրբեջանական տարածքները»:

«Ադրբեջանը բազմիցս հայտարարել ու հայտարարում է, որ օկուպանտ երկիր Հայաստանի և Լեռնային Ղարաբաղի անջատողական վարչակարգի հետ ցանկացած մակարդակով շփումների հանդեպ մենք շատ «զգայուն ենք»: Այդ պատճառով էլ այդ չվերթի գործարկումը դիտարկում ենք որպես աջակցություն զավթիչ երկրին»,-նշել է Հասանովը:

Նա հավելել է, որ Բաքվի համար հատկապես մտահոգիչ է այն, որ Հայաստանի հետ հարաբերություններ է հաստատում իրենց եղբայրական երկիր Թուրքիան: «Երբ Հայաստանի հետ հարաբերությունները խորացնում է այնպիսի երկիր, որի հետ մենք բարեկամական կապեր ունենք, և որի ռազմավարական շահերը համընկնում են Ադրբեջանի շահերին, ապա մենք կրկնակի խանդով ենք վերաբերվում դրան»,-նշել է Հասանովը:

Երևան-Վան- Երևան ուղիղ չվերթերը կգործարկվեն 2013թ.  ապրիլի 3–ից. շաբաթական երկու անգամ չվերթեր կիրականացվեն Երևանից Վան և հակառակ ուղղությամբ: Երևան-Վան չվերթի տոմսի արժեքը կլինի 250 ամերիկյան դոլարին  համարժեք դրամ (առաջին ամսվա համար սահմանվել է 20 տոկոսի զեղչ)։

Հավելենք, որ ղարաբաղյան պատերազմի ժամանակ (1988-1994թթ.) Անկարան, ի աջակցություն Ադրբեջանի, 1993թ. փակեց Հայաստանի հետ սահմանը և խզեց դիվանագիտական հարաբերությունները մեր երկրի հետ:

http://tert.am/am/news/2013/03/16/yerevan-van/