Պաշտոնական այցով Շվեդիայում գտնվող Թուրքիայի նախագահ Աբդուլլահ Գյուլը խոսել է նաեւ Շվեդիայի խորհրդարանի կողմից 2010 թ. մարտի 11-ին ընդունված Հայոց ցեղասպանությունը դատապարտող օրինագծին եւ հայ-թուրքական հարաբերություններին։
Թուրքական Haber3 կայքի փոխանցմամբ՝ Թուրքիայի նախագահը, Ստոկհոլմում լրագրողների հետ հանդիպման ժամանակ պատասխանելով լրագրողներից մեկի՝ Շվեդիայի կողմից Ցեղասպանությունը դատապարտող բանաձեւի հետ կապված հարցին, կրկնել է, թե նմանատիպ բաները խորհրդարանների գործը չեն։ Գյուլը շեշտել է, թե ինքը 20 տարվա քաղաքական գործունեության փորձ ունի եւ գիտի, թե նման որոշումներն ինչպես են ընդունվում։
«Դրանք սխալ են։ Դրանք հարաբերությունները ստվերում են։ Այդ պատճառով անհրաժեշտ է, որ այդ ամենը թողնվի պատմաբաններին։ Մենք Հայաստանին մի բաց առաջարկ ունենք՝ եկեք պատմաբանների համատեղ հանձնաժողով ստեղծենք։ Եթե 3-րդ երկրները հետաքրքրվում են դրանով, թող մասնակցեն, եւ գիտնականները որոշում ընդունեն»,-ասել է Թուրքիայի նախագահը։
Լրագրողներից մեկն ուշադրություն է դարձրել այն հանգամանքի վրա, որ Գյուլի այցը համընկնում է Շվեդիայում Ցեղասպանությունը դատապարտող բանաձեւի ընդունման օրերին, ինչին ի պատասխան, Թուրքիայի նախագահը նշել է, թե շվեդական կառավարությունը չի կիրառում այդ բանաձեւը։
Leave a Reply