Հայոց ցեղասպանությունն իրողություն է, Հրանտ Դինքի մարդասպանը թուրքական պետությունն է. թուրք լրագրող

Անկարայի անվտանգության տնօրինությունը խնդրագիր է ներկայացրել հանրապետական դատախազությանը Քրեական օրենսգրքի տխրահռչակ 301-րդ հոդվածը ոտնահարելու մեղադրանքով լրագրող Թեմել Դեմիրերի նկատմամբ դատական գործընթացը շարունակելու թույլտվություն ստանալու համար: Դիմումի մեջ նշվում է, որ թեեւ «թուրք ազգին, պետությանը, պետական կառույցներին եւ մարմիններին նվաստացնելու» համար լրագրողի նկատմամբ նախկինում բացված դատական գործը հետաձգվել է` երեք տարվա ընթացքում նման «հանցանք» չգործելու պայմանով, սակայն Դեմիրերը շարունակում է պնդել, որ Հայոց ցեղասպանությունը փաստ է, Հրանտ Դինքի մարդասպանը թուրքական պետությունն է, ինչը հանդիսացել էր նրա դեմ բացված նախորդ դատական գործի պատճառը:            

Ինչպես հաղորդում է «Արմենպրես»–ը, թուրքական bianet.org լրատվական կայքի հետ զրույցում Դեմիրերն ասել է, որ Թուրքիայում ՔՕ 301-րդ հոդվածի հետ կապված ոչ մի փոփոխություն էլ տեղի չի ունեցել, ինչի մասին հակառակն են պնդում իշխանությունները: «Եթե այդ հոդվածի շուրջ փոփոխություն կա, ապա ինչու են փորձում իմ նկատմամբ կրկին դատական գործ բացել: Ստացվում է, որ եթե ես երեք տարի չկրկնեի իմ պնդումներն, ապա կարդարացվեի», -ասել է նա:

Թուրք լրագրողը հայտարարում է, որ Հայոց ցեղասպանությունն իրողություն է, իսկ Հրանտ Դինքի մարդասպանն էլ թուրքական պետությունն է: «Եթե արդարադատական ատյանները, ոստիկանությունը, նախկին դատս հետաձգած արդարադատության նախարարությունն այժմ իմ նկատմամբ դատ չբացեն, հանցագործություն գործած կլինեն», -ասել է նա:

Դեմիրերը նշել է, որ իր դեմ դատական գործի շարունակումը խոսում է այն մասին, որ Թուրքիայում ազգայնամոլական մտածելակերպը չի փոխվել: «Զարմանալի բան չկա: Սա հանդիսանում է չփոխված մտածելակերպի արգասիք: Իշխանությունները հայտարարում են, թե ժողովրդավարացվել են, բայց դա սուտ է», -ասել է նա:

Ստամբուլի «Ակօս» թերթի հայազգի խմբագրապետ Հրանտ Դինքի` 2007 թ. հունվարի 19-ին թուրքական ազգայնական շրջանակների կողմից դավադրաբար սպանվելու հաջորդ օրը Դեմիրերը հայտարարել էր, որ Դինքը սպանվել է ոչ թե հայ լինելու, այլ Հայոց ցեղասպանությունը կատարված փաստ ճանաչելու համար, ինչի համար, 301-րդ հոդվածի համաձայն, նրա դեմ երկու տարի ազատազրկման պահանջով դատական գործ էր բացվել: 2013 թ. փետրվարի 19-ին տեղի ունեցած վերջին դատալսման ժամանակ Դեմիրերը պահանջել էր իր հայտարարության համար կամ ազատազրկել իրեն, կամ էլ արդարացնել: Սակայն դատարանը կրկին հետաձգել էր դատը: Դատարանից դուրս գալուց անմիջապես հետո Թեմել Դեմիրերը լրագրողներին հայտարարել էր. «Ես կրկին նույն հանցանքն եմ գործում. Հրանտ Դինքի մարդասպանը պետությունն է»:

http://armenpress.am/arm/news/711219/hayoc-cexaspanutyunn-iroxutyun-ehrant-dinqi-mardaspany.html