Թուրք նախարարը «չի հիշում», որ ասորիների ջարդերի ճանաչմանն ուղղված ջանքերը «մաստուրբացիա է» անվանել

Թուրքիայի` Եվրամիության հարցերով պետնախարար Էգեմեն Բաղըշը «չի հիշում», որ ասորի ժողովրդի հասցեին սեռական բնույթի վիրավորանք է հնչեցրել:

Հիշեցնենք, որ օրեր առաջ տխռրահռչակ թուրք պաշտոնյան Օսմանյան կայսրությունում 1915-1924թթ. տեղի ունեցած ասորիների ջարդերը որպես ցեղասպանություն ճանաչելուն ուղղված ջանքերը համեմատել էր ձեռնաշարժության հետ: «Սեյֆոյի (ասորերեն՝ ցեղասպանություն) հարցը «ձեռնաշարժություն» եք դարձրել ու թմբկահարում Շվեդիայի խորհրդարանում և ԶԼՄ-ներում, դրանով ինչի՞ եք ցանկանում հասնել»,-Շվեդիայում Թուրքիայի դեսպանատանը ասորական համայնքի ներկայացուցիչների հետ հանդիպման ժամանակ ասել էր Բաղըշը:

Ինչպես հաղորդում է թուրքական Todayszaman.com կայքը, թուրք նախարարը մարտի 11-ին «ետ է կանգնել» իր խոսքերից. Շվեդիայում (նա Ստոկհոլմ է ժամանել Թուրքիայի նախագահ Աբդուլլահ Գյուլի գլխավորած պատվիրակության կազմում) հայտարարել է, թե ինքը չի հիշում, որ նման բան է ասել: Սկանդալների «սիրահար» թուրք պաշտոնյան հավելել է, թե «նպատակ չի ունեցել վիրավորել որևէ մեկին», բայց եթե վիրավորել  է, ապա «պատրաստ է ներողություն խնդրել»:
Շվեդիայի ասորիների դաշնության նախագահ Քենան Անթերին զարմացրել ու վրդովվեցրել է թուրք նախարարի այդ խոսքերը: «Նախևառաջ, նա ներողություն չխնդրեց: Նա պարզապես ասել է, թե պատրաստ է ներողություն խնդրել, եթե ինչ-որ մեկին վիրավորել է: Նա այդ կերպ ակնարկում է, որ մենք՝ հանդիպմանը ներկա 7-8 ասորիներս, որ հարգելով նրան ու դեսպանին` չհեռացանք, ստում ենք»,-ասել է Քենանը և հավելել,- Նա գոնե կարող էր չհերքել, որ նման բան է ասել»:

Հավելենք միայն, որ Բաղըշը բազմիցս սկանդալների կենտրոնում է հայտնվում իր անհավասարակշիռ պահվածքի ու հյատարարությունների համար: Մոտ մեկ տարի առաջ Շվեյցարայում, որտեղ Հայոց ցեղասպանության ժխտումը պատժվում է օրենքով, հրապարակավ  հայտարարել էր, թե «1915թ. դեպքերը ցեղասպանություն չեն։ Թող գան ու ձերբակալեն ինձ»: Պետնախարարի նկատմամբ քրեական գործ էր հարուցվել, որը շաբաթներ անց կարճվել էր՝ Բաղըշի դիվանագիտական անձեռնմխելիության պատճառով:

http://tert.am/am/news/2013/03/13/bagis/