Վրաստանի վարչապետ Բիձինա Իվանիշվիլիի կողմից Աջարիայի ինքնավար հանրապետության կառավարության ղեկավար նշանակված Արչիլ Խաբաձեն այցելել է Թուրքիայի Արդվինի նահանգապետ Նեջմեթին Քալքանին եւ քննարկել փոխհամագործակցության հետ կապված հարցեր։
Թուրքական «Ջիհան» լրատվական գործակալության փոխանցմամբ՝ Արդվինի նահանգապետ Նեջմեթին Քալքանը եւ Աջարիայի ինքնավար հանրապետության կառավարության ղեկավար Արչիլ Խաբաձեն մի շարք թեմաների շուրջ զրուցելուց հետո այցելել են Արդվին նահանգի Յուսուֆելիի շրջանում գտնվող Իշխան գյուղի Իշխան եկեղեցին։ Այնուհետ պաշտոնյաները պատասխանել են լրագրողների հարցերին։
Լրագրողներից մեկի հարցին, թե կնպաստի՞ եկեղեցու վերանորոգումը Վրաստանի եւ Թուրքիայի միջեւ տուրիզմի զարգացմանը, Արչիլ Խաբաձեն նշել է, թե նմանատիպ հանդիպումները եւ պատմական արժեքների պահպանմանն ուղղված աշխատանքները խթան կհանդիսանան երկու երկրների միջեւ տուրզմի զարգացմանը։
Արդվինի նահանգապետն ի հերթին նշել է, որ Իշխան եկեղեցու վերանորոգման աշխատանքները կավարտվեն 2013 թ. դեկտեմբերին։
Նշենք, որ հայ մասնագետները բազմիցս հայտարարել են, որ Օշքվանքը եւ Իշխանը կրում են հայկական եկեղեցու ճարտարապետության բոլոր առանձնահատկությունները, եւ, ավելին, նույնիսկ նրանց անուններն են հայկական։
Օշքվանքը եւ նրանից ոչ հեռվում գտնվող Իշխան եկեղեցին տեղի իշխանությունները փորձում են վերագրել վրացական մշակույթին։ Վրացիները հատուկ այցելում են այդ եկեղեցիներ եւ պնդում թուրքական իշխանություններին, որ դրանք վրացական մշակույթի ժառանգություններ են։
Leave a Reply