«Հրկիզումների հեղափոխությունը հասե՞լ է Նախիջևան»

Ադրբեջանում սոցիալական դժգոհության ամենատարածված ձեւը իշխող վարչախմբի ներկայացուցիչների առանձնատների հրկիզումն է, որ սկիզբ է առել անցյալ գարնանը Ղուբայի շրջանից: Այս տարվա փետրվարին նույնը կրկնվեց Իսմայիլիիում: Երկու դեպքում էլ գործադիր իշխանության ղեկավարներն ազատվեցին զբաղեցրած պաշտոններից: Ինչպես տեղեկագրում է haqqin.az-ը, «անցյալ շաբաթ օրը լրիվ այրվել է Նախիջեւանի Գերագույն մեջլիսի նախագահ Վասիֆ Թալիբովի ամառանոցը, որ կառուցված էր Շահբուզի շրջանի բարձրլեռնային Բաթաբաթ տեղանքում, լողացող կղզիով հայտնի լճի ափին»:

Որ տեղի ունեցածը դիտավորյալ հրկիզման հետեւանք է, լրատվամիջոցը, հղում անելով «Նախիջեւանից իրազեկ աղբյուրների», մեկնաբանում է, որ «ամառանոցում ձմռանը էլեկտրականությունն անջատվում է, եւ այդ պահին այնտեղ ոչ ոք չի եղել»: Հրշեջ-փրկարարները հնարավորություն չեն ունեցել փրկելու ամառանոցը, «քանի որ «առատ ձյան պատճառով ճանապարներն անանցանելի էին»:

Փետրվարի 4-ին elitar.az-ը գրել էր, որ Վասիֆ Թալիբովը «ինֆարկտ է տարել եւ բուժվում է Թուրքիայի առաջատար կլինիկաներից մեկում»: Հայտնի չէ` Թալիբովը ներկայում շարունակո՞ւմ է բուժումը, թե՞ վերադարձել է Նախիջեւան: Ամեն դեպքում փաստն արտառոց է նրանով, որ Թալիբովը համարվում է Նախիջեւանի «խան», որ լիովին վերահսկում է իր «հայրենակալվածքի» ամենաչնչին անցուդարձն իսկ:

Ադրբեջանի իշխող վարչախմբում Վասիֆ Թալիբովը հնաբնակներից է: Նա Նախիջեւանի Գերագույն մեջլիսի նախագահ է ընտրվել 1993 թ. ամռանը, երբ Հեյդար Ալիեւը «հրավիրվել է» Բաքու: Թալիբովը իշխող վարչախմբի ոչ միայն քաղաքական համախոհն է, այլեւ` հարազատը: Նրա կինը Հեյդար Ալիեւի մորաքրոջ թոռն է: Թալիբովը բարեկամական կապ ունի նաեւ Իլհամ Ալիեւի անվտանգության ծառայության պետ Բեյլար Էյուբովի հետ. նրանք քենակալներ են:

Այս ամենի նկատառմամբ կարելի է ասել, որ Վասիֆ Թալիբովի դեմ որեւէ քայլ պետք է համարել ընդդեմ Իլհամ Ալիեւի, ընդդեմ իշխող ընտանիքի «անառարկելի հեղինակության եւ բարձր ժողովրդականության»: Բայց կա նաեւ խնդրի երկրորդ կողմը` Թալիբովի առանձնատան հրկիզումը վկայում է, որ Նախիջեւանի «խանությունում» սոցիալական դժգոհությունն այն աստիճանի սուր է, որ մարդիկ, դիմելով ծայրահեղ քայլի, հոգեբանորեն հաղթահարել են վախը:

Բացառված չէ, որ Նախիջեւանում մոտակա օրերին սկսվի բռնությունների նոր ալիք: Իսկ դա իր հերթին կարող է սրել իրավիճակը` տեղիք տալով բողոքի զանգվածային ցույցերի:

Վ. Ա.

http://azg.am/AM/2013031208