Թուրք իրավապաշտպանները պահանջում են տարեց հայ կանանց դեմ հարձակման գործը բաց հետաքննել

Ստամբուլի Սամաթյա թաղամասում տարեց հայ կանանց դեմ հարձակումների մեջ մեղադրվող Մուրադ Նազարյանի հետ հանդիպումից հետո փաստաբան Էրեն Քեսքինը պահանջել է հանել հարձակումների գործով հետաքննությունը գաղտնի վարելու որոշումը եւ հետազոտել կասկածյալի հոգեկան վիճակը։

Ստամբուլի հայկական «Ակօս» շաբաթաթերթի փոխանցմամբ՝  Թուրքիայի մարդու իրավունքների միության Ստամբուլի մասնաճյուղը Սամաթյայի հայ կանանց դեմ հարձակումների հետ կապված մամուլի ասուլիս է կազմակերպել, որի ժամանակ փաստաբան Էրեն Քեսքինը հայտնել է, որ հանդիպել է բանտում գտնվող Մուրադ Նազարյանի հետ՝ շեշտելով, թե հանդիպման ժամանակ Մուրադն արտասվում էր եւ հարցերին ի պատասխան, ասում, որ չի հիշում։

«Իմ ենթադրությունն այն է, որ Մ.Ն.-ն հիվանդ է։ Եթե այդ հարձակումները Մ.Ն.-ն է իրականացրել, ապա նա միայնակ չի եղել։ Ականատեսները վկայում են, որ մեքենայի մեջ 2 հոգի սպասել են։  Բացի այդ, Մ.Ն.-ն որոշ ժամանակ թմրանյութի կախվածությունից բուժման կուրս է անցել եւ ուրիշների համար օգտագործվող մի անձ կարող էր հանդիսանալ»,-նշել է Քեսքինը՝ շեշտելով, թե չի հասկանում, թե ինչու է հետաքննությունը գաղտնի ընթանում, երբ կասկածյալը հայտնաբերվել է։

Էրեն Քեսքինը ուշադրություն է դարձրել այն հանգամանքի վրա, որ կասկածյալի մոտ կան հոգեկան շեղման մասին վկայող բազմաթիվ փաստեր, եւ անհրաժեշտ է նրան ենթարկել դատաբժշկական ստուգման։

Մարդու իրավունքների միության անունից հայտարարությամբ հանդես եկած Այշե Գյունայսուն հայտարարել է, թե չնայած որ նշվում է, թե հարձակումների նպատակը թալանն է եղել, սակայն տուժողների հետ զրույցներում չեն հաստատում այդ փաստը։

«Թուրֆանդա Աշըքին րոպեներով ծեծել էին, սակայն տան իրերին չէին դիպչել, ոչինչ չէին գողացել։ Սուլթան Այքարին եւս դաժան ծեծի էին ենթարկել, սակայն ձեռքի պայուսակը վերցնելու փորձ չէին արել»,-ասել է Գյունայսուն՝ պնդելով, որ լուրջ կասկածներ կան, որ Մ.Ն.-ն օգտագործվել է, եւ անհրաժեշտ է բացահայտել գործն ամբողջությամբ։

Նշենք, որ մարտի 3-ին Ստամբուլի ոստիկանությունը ձերբակալել է ստամբուլահայ Մուրադ Նազարյանին՝ մեղադրելով նրան Սամաթյա թաղամասում տարեց հայ կանանց դեմ հարձակման մեջ։

Թուրքական Hurriyet-ի թղթակիցը զրուցել էր Մուրադ Նազարյանին ճանաչողների հետ եւ պարզել, որ ոչ մեկն էլ չի կարողացել հավատալ, որ Մուրադը նման բան կարող էր անել։

http://news.am/arm/news/143987.html