Պոլսահայ համայնքի ներկայացուցիչները «Խաչի ճանապարհ» անունն ստացած ուխտագնացություն են սկսել, որն ընդգրկում է Կայսերիի (Կեսարիա), Իսկենդերունի և Հաթայի հայկական եկեղեցիները, հաղորդում է թուրքական “Haberler” լրատվական կայքը:
Ուխտագնացության առաջին կանգառը եղել է Կեսարիայում գնտվող Սուրբ Գրիգոր Լուսավորիչ եկեղեցին, որտեղ պատարագ է մատուցվել։
Հայոց պատրիարքարանից քահանա Գրիգոր Դամադյանի կողմից մատուցված պատարագին մասնակցել են ինչպես Ստամբուլի հայեր, այնպես էլ հայեր` աշխարհի տարբեր երկրներից:
Պատարագին մասնակցել է նաև Սահակ եպիսկոպոս Մաշալյանը։
«Կեսարիան մեր հավատի ակունքներում է։ Մեր՝ հայերիս քրիստոնեացումն սկսել է Լուսավորիչով։ Տեղի ունեցած պատարագով մենք թե՛ մեր պարտականությունն ենք կատարում, թե՛ հիշում ենք Գրիգոր Լուսավորչին։ Աստծուց շնորհակալ ենք, որ այս եկեղեցին կա։ Կեսարիան նախկինում քրիստոնեական կենտրոն է եղել։ Այս քաղաքը մեզ համար կարևոր նշանակություն ունի»,- ասել է Մաշալյանը։
Եկեղեցում հայերը մոմ են վառել, աղոթել և օրհնված հաց բաժանել։
Leave a Reply